Teknologia

EAEko hauteskundeen kanpaina historiara pasatuko da, web parte hartzailea (web 2.0) ezinbestekoa izan duen lehenengoa baita. Alderdiak buru belarri ibili dira beraien hitzaldiak eta iritziak webguneen eta blogen bidez ere zabaltzen, eta Facebookek, Twitterrek, Tuentik eta beste hainbat sare sozialek indartsu egin dute kanpainan barrena.

Izan ere, web 2.0 ideiaren ezaugarri nagusia zera da, mezuaren hartzailea (boto-emailea) igorlea dela aldi berean (webmaster, blogari, iritzi-emaile,...). Eta hori da hain zuzen ere gertatzen ari dena. eitb.com-en aipagarri iruditu zaizkigun ekimen batzuk komentatuko ditugu.

Aupatu!

Aupatu (''digg'' eta ''meneame'' sareen euskal anaia) duela urte eta erdi jaio zen, Interneteko erabiltzaileei euren blogak eta webguneak sustatzeko erreminta bat emateko xedez. Erabiltzaileek linkak bidaltzen dituzte, besteen albisteak bozkatu..., eta berriek boto nahikoak lortuz gero, portadan ager daitezke. Dagoeneko 10.000 albiste baino gehiago bidali dituzte urte eta erdian.

Aupatu erreferentzia bihurtzen ari da hauteskunde hauetan ideologia guztietako blogari askorentzat, euren ideiekin bat egiten duten artikuluak bidaltzen ari baitira, gainerako erabiltzaileek bozka ditzaten.

Politika2.0

Blogari hauek asmo zehatza daukate: Interneten eztabaida egiteko lekua sortzea, norberak bere iritzia azaldu eta Euskadiko eztabaida politikoa aberasteko helburuz. Kanpaina honetan, zenbait ekimen berritzaile abiatu dituzte.

Alde batetik 119 segundos daukate. Horretan, politikariek herritarren galderei erantzun diete, 2 minututan. Bestaldetik, Hamaika minutu ekimenean, blogariak 11 minutuko elkarrizketak grabatzen ari dira lehendakarigaiekin, eta kanpainako azken egunean sarean jarriko dituzte.

Halaber, bi ekimen gehiago egingo dituzte EITBren Bilboko egoitzan hausnarketa egunean eta hauteskundeen egunean bertan: Otsailaren 28an, "aurreko egunean", Interneteko hauteskunde kanpainaren nondik norakoak aztertuko dituzte. Eta hauteskunde gauean hamar blogari inguru eitb.com-eko lantaldearekin izango dira, Multimedia talde baten barruan hauteskundeak nola jarraitzen dituzten gertutik ikusteko.

Fevas

Bere aldetik, Adimen Urritasuna dutenen Aldeko Elkarteen Euskal Federakuntzak (Fevas) Eusko Legebiltzarrean ordezkaritza duten eta aurtengo hauteskundeetara aurkeztu diren alderdietako lehendakarigaiak elkarrizketatzea lortu du, eta politika sozialei eta adimen urritasunari buruz galdetu die.

Elkarrizketak grabatu egin dituzte, ondoren Youtuben igo, eta orain haien webgunean daude ikusgai. Elkarte sozialen artean aurrekaririk ez duen ekimena da.

Eleccionesvascas puntu...

EHUtik, Iker Merodiok eleccionesvascas2009.wordpress.com/ webgunea jarri du abian, prentsa idatzian kanpaina nola tratatzen ari diren aztertzeko. Bere aldetik, Javi Dominguez kazetaria eleccionesvascas2009.blogspot.com/ blogean ari da iritzia ematen.

eleccionesvascas.com domeinua sare sozialekin lan egiten duen enpresa batena da duela urte askotatik, eta bertan euskal politikagintzari buruzko metabloga dauka. Aurten test dibertigarria sortu dute, noren alde bozkatuko duzun asmatzen saiatzeko. Helburua ondo pasatzea baino ez da. Beraz, ez haserretu emaitzak ez badu zure benetako asmoekin bat egiten... ;-)