eguraldia

Gasteizeko zenbait herritar kaltetuak izan ziren asteazken arratsaldean botatako txingor ekaitzaren ondorioz; Udalak, haientzat, arreta-bulego bat zabaldu du Espainia Plazako udal-erregistroaren bulegoetan. Hor, euren aseguru-etxeei egin behar dituzten erreklamazioak nola bideratu azalduko diete. Bulegoa goizeko bederatzietatik arratsaldeko ordu bietara arte dago irekita, eta, arratsaldean, 16:30etik 19:00etara; halaber, Gasteizeko Hiritar-zentroetan ere informazioa lortu ahal dute. Lagun asko joan dira arreta-bulegora goizetik, bereziki autoetako leihoetan eta txapan izandako kalteengatik, eta etxebizitzetako pertsianetan.

10 bat minutuko iraupena izan zuen ekaitzak eta 17:00 aldera hasi zen. Txingorrak gehien kaltetu zituen auzoak Lakua, Zabalgana, Ariznavarra eta Armentia izan ziren, baina beste zona batzuetan kalte ugari utzi zituen, erdialdean adibidez, bereziki ibilgailuetan. Txingor zatiak oso handiak izan ziren une batzuetan, irudi hauetan ikusten denez. Hiriko zenbait tokitan baltsak osatu ziren.

Erabiltzaileek, lehen unetik, ekaitzeko argazkirik onenak bidali dituzte eitb.com-era.