eguraldia

Elurra Euskal Autonomia Erkidegora itzuliko da gaur, batez ere eguerditik aurrera, Eusko Jaurlaritzaren Herrizaingo Sailak jakinarazi duenez; osteguneko azken ordura arte, behintzat, elurteek eragindako alerta horiak gurean jarraituko du. Euskalmet Euskal Meteorologia Agentziaren kalkuluen arabera, 12:00etatik 18:00etara 4 l/m2 jasoko dira, baina tarte horretan 8 l/m2 ere pilatzeko aukera dago. Ondorengo orduetan, hain zuzen ere, ordu horietarako daude iragarrita prezipitaziorik nabarmenenak. Kantaurialdean bustiko du batez ere.

Gainera, Herrizaingo Sailak osteguneko amaierara arte izango du ezarrita izozteek eragindako alerta horia. Lurraldeko edozein puntutan egin lezake izotza.

Euskalmeten iturriek jakinarazi dutenez, gaur, asteazkena, hodei ugari agertuko dira zeruan, eta maximoak 5º-koak izango dira kostaldean. Ostegunean, nahiz eta goizaldean eta azken orduan apur bat bustiko duen, eguerdian giro lehorra izan genezake, eta ostarteren bat zabaltzeko aukera ere egongo da. Ostiralak ildo beretik jarraituko du: egunaren hasieran eta amaieran euria edo elurra egiteko aukerarik handiena egongo da, baina eguerdia lasaiagoa izango da. Elur-kota 400-500 metrora kokatuko da arratsalde-gauean.