eitb taldea

Ez ahaztu Alzheimerraz / No te olvides del Alzheimer lelopean, EITB Taldeko komunikabideek (Euskal Telebista, Euskadi Irratia, Radio Euskadi, Radio Vitoria, Gaztea, EITB Musika eta eitb.com) Alzheimerraren inguruko informazio eta sentsibilizazio kanpaina burutu dute eta gaur izan da egun nagusia. Elkartasun maratoiaren bidez egun osoan zehar diru laguntza batzeko ahalegin berezia egin da. 902 54 25 25 telefonora hots egin behar izan dute dirua eman nahi izan duten lagun guztiek eta deiei erantzuten lagun famatuak izan dira. Gainera, aurten, berriz ere, eitb.com-en bidez dirua eman ahal izango da Eventbis enpresak garatutako aplikazioaren bidez. Bildutako diru guztia beste behin ikerkuntzara zuzenduko du EITBK.

Gauerdi aldera, egunean zehar lortutako diruaren zifra eman zen: 364.133 euro. Baina hori ez da azken emaitza, kolaboratzen jarrai dezakegulako; izan ere, 403.528 eurotan kokatzen da zifra orain. Aurreko edizioa kontuan hartuta, 100.000 euro baino gehiagotan gainditu da zifra. Aipatzekoa da Gipuzkoa izan dela dei gehien egin dituen lurraldea, Bizkaia atzetik duela. Bestalde, aurreko urtetan bezala, emakumeak izan dira solidarioenak.

EITBren aurtengo elkartasun maratoiak Alzheimerraren Nazioarteko Urtearekin bat egin du, modu berezian gainera, telefonoa eta leloa idatzita dituen eskumuturreko morea kanpainaren sinbolo bilakatuz. Abenduaren 5etik aurrera ETBko programetako aurkezle eta kolaboratzaileek erakutsi dute eskumuturrekoa eta abenduaren10ean Bilbo, Donostia eta Vitoria-Gasteizen banatu zituzten pultsera hauek.

Asteazkeneko programazio bereziaren barruan, 'Egun On Euskadi'k ekin dio zuzenean maratoiaren inguruan berri emateari. Ainhoa Furundarena kazetaria izan da deigunean eta lehen konexioan Miguel Angel Idigoras ETBko zuzendariarekin batera, Nuria Pascual BIO fundazioko Ikerketa koordinatzailea eta Koldo Aulestia AFAGI elkarteko presidentea elkarrizketatu ditu.

Albistegiaren ondoren ikusgai den 'Forum' elkarrizketa saioan, David Barberok Manuel Fernandez neurologo eta ikertzailea hartu du. 2002an EITBk Alzheimerrarerako bildutako diruarekin aurrera atera diren ikerketetako baten buru da Fernandez. Ikerketa genetikoa da hain zuzen, gaixotasuna aurrez antzematen lagundu dezaketen ezaugarri genetikorik ote dagoen aztertzen duena. Egindako lanaren nondik norakoak azaldu dizkio David Barberori.

'Gaur Egun' eta 'Teleberri' albistegietan, EITB Maratoiaren inguruko azken berriak eman dituzte Amaia Uribe kazetariak eguerdian, eta Oiane Mateosek gauean. ETBko arratsaldeko bi magazinetan, 'Ni Más Ni Menos' eta 'Arratsaldero'n ere, bat egin dute deiak biltzen dituen gunearekin. Klaudio Landak gidatzen duen ETB-2ko saioak Nagore Real kazetaria izan du bertan eta Estitxu Fernandez eta Oihan Vegak ETB-1en aurkezten duen saioak, berriz, Xabier Mendia.

Adela Gonzalezek ETB-2n aurkezten duen 'Euskadi Directo' albistegiak ere arreta berezia eskaini dio azken egunotan Alzheimerrari, egunero gaiaren inguruko erreportaje berezi batekin. Elkartasun egunean Maria Jurado kazetariak jarraitu du diru bilketa nola joan den.

Zaintzaileak dokumentalaren estreinaldia eta 'Consumidores' saio berezia

Gauean programazio berezia izan da Euskal Telebistan. ETB-1ek Zaintzaileak dokumentala estreinatu du eta ETB-2n 'Consumidores' saio berezia egin dute, oso-osorik Alzheimerrari eskainia.

Alzheimerra duen gaixo bat zaintzeaz arduratzen direnen bizitzari buruzko dokumentala da Zaintzaileak, Oskar Tejedorrek zuzendua. Endekapenezko gaixotasunak dituztenen senitarteko-zaintzaileak hamabostean behin elkartzen dira azken urte eta erdian. Beldurrak eta ikarak azaleratzen dituzte, esperientziak trukatzen eta, batez ere, eguneroko egoera barregarriak eta, tarteka, baita deserosoak ere erlatibizatzen ikasten dute.

Zaintzaile bakoitzaren jarraipen pertsonalizatua egiten du dokumentalak, bai etxean baita eguneroko ekintzetan ere, beren egunez eguneko errealitate pertsonala, familiarra eta soziala islatuz. Horrela, behaketari esker, emoziozko puzzle korapilatsu baten pusketak osatzen dituzten istorio txiki eta partikularrak agerian geratu dira.

‘Consumidores’ berezia izan da ETB-2n Alzheimerraren inguruan. Gaixo eta senideen lekukoak bildu dituzte. Euskadin ikerkuntzaren esparruan egiten ari diren guztiaren berri ere eman dute. Halaber, eztabaida eta hausnarketa izan da: ‘Gaixo bati Alzheimerra duela esan behar ahal zaio?’ galdera izan dute abiapuntu.

Gainera, zinean gaixotasun hau nola jorratzen duten aipatu dute eta umeei Alzheimerra nola azaldu behar zaien ere kontatu dute.

Marka solidario bat ere hautsi nahi izan dute ‘Consumidores’ saioan, Fernando Canales, Yolanda Alzola, Iker Galartza eta Roberto Lopez Ufarte lagun dituztela. Munduko euskal pastelik handiena egin nahi izan dute.

Bi kateetan herritarren deiak jasotzeko egokitu den aretoarekin zuzenekoak egin dituzte gauerdira bitartean: Joana Lasheras eta Urko Aristi aritu dira ETB-1en eta Ana Urrutia eta Iñaki Lopez ETB-2n. Alberto Surio EITBko zuzendari nagusiaren ahotan jakin dugu zenbat diru bildu den.

Ehun bat ezagun deiak hartzen

EITB Maratoiaren egunean, nola ez, telefono deiak jasotzen ehun bat lagun ezagun aritu da. Telebista eta irratiko aurkezle, aktore, kazetari eta kolaboratzaile ugari egon dira dei gunean: besteak beste, Julian Iantzi, Vanessa Sanchez, Xabier Usabiaga, David Barbero, Maite Esparza, Jose Ituarte, Luis Alfonso Gamez, Pedro Mari Goikoetxea, Ibon Uzkudun, Roge Blasco, Juan Carlos de Rojo, Txetxu Ugalde, Joseina Etxeberria, Edurne Garmendia, Txumari Alfaro, Txema Montoia, Paloma Zorrilla, Pili Kaltzada, Gorka Landaburu, Maider Otegi, Julen Madina eta Aintzane Gamiz.

EITB Maratoiarekin bat egin duten aktoreen artean Iban Garate, Joseba Apaolaza, Itziar Lazkano, Maribel Salas, Iñigo Salinero, Yanick Bergara, Miriam Cabeza, Gurutze Beitia, Ane Gabarain, Klara Badiola, Itziar Aizpuru, Gorka Aginagalde, Xabier Perurena, Koldo Losada, Kike Biguri, Txema Vitoria, Fernando Ruiz, Susana Soleto, Loli Astoreka eta Esther Velasco daude, baita Garbiñe Losada antzerki zuzendaria, Txan eta Jon Zabal magoak eta La Otxoa.

Kirol munduko beste hainbat aurpegi ezagun ere topatu ditugu, hala nola, Abraham Olano, Maider Unda, Eneko Llanos, Juanito Oiarzabal, Ander, Angela eta Andres Vilariño, Juanjo San Sebastian, Javier Conde, Marino Lejarreta, Oier Aizpurua, Iker Pascual, Txus Jaio, Igor Anton, Miguel Madariaga, Iñaki eta Iñaxio Perurena, Roberto Lopez Ufarte, Ismael Urzaiz, Mikel Goñi, Herri Torrontegi, Iker Fuentes, Alex Txikon, nesken Athletic taldeko Aitziber Juaristi eta Iraia Iturregi, eta Alaves taldeko Gorka Azkorra eta Sendoa Agirre.

Kultur jarduera ezberdinetan aritzen diren hainbat lagun ere egon dira, esate baterako, Onintza Enbeita eta Iratxe Ibarra bertsolariak; Etxe, Javier Muguruza, Amaia Zubiria eta Mikel Markez musikariak; Jasone Osoro eta Toti Martínez de Lezea idazleak; Eneko Atxa sukaldaria; Mercedes de Miguel eta Alicia Rueda moda diseinatzaileak eta Luis Chillida.

Halaber, bat egin dute ekimenarekin Rafael Bengoa Osasun sailburuak eta Euskal Herriko Alzheimer elkarteen ordezkari eta boluntariok.

EITB Maratoia irratietan eta Interneten

EITB komunikazio taldeko irratiek ere arreta berezia eskaini diote EITB Maratoiari, telefono gunearekin zuzeneko harremana mantenduz. Euskadi Irratian Esther Aizpurua izan da berriemaile eta Radio Euskadin, berriz, Ander Iribar goizean eta Aitor Moriyon arratsaldean.

Interneti dagokionez, eitb.com-en bidez Maratoiaren egunean gertatzen den guztia zuzenean jarraitu ahal izan da. Informazioa eta bildutako diru kopurua aldioro eguneratu dute. EITBk hamabigarren urtez jarraian egiten duen elkartasun kanpainaren inguruko informazio zabala ere topatu daiteke bertan.

Euskaltelen eskuhartzea

Euskaltelek EITB Maratoian iaz egindako ekarpena errepikatu du. Telebista Interaktiboko bezeroek telebistako urrutiko kontrola erabiliz parte hartu ahal izan dute. Ikus-entzule hauek telebistako beheko aldean EITB Maratoiarekin parte hartzera animatuz mezua ikusi dute.