musika

Conrad Murray, Michael Jacksonen medikua, da erailketaren ikerketaren ardatza. Izan ere, ikerketaren iturriek baieztatu egin dute artistari anestesiko bat eman ziotela hil baino ordu batzuk lehenago. Murray Jacksonek Los Angelesen (Kalifornia) zeukan etxean zegoen ekainaren 25ean, haren heriotzaren egunean eta hark egin zion artistari bihotz-biriketako suspertze maniobra, arnasa ez zuela hartzen ohartzean.

Medikua lekuko gisa hainbat alditan galdekatu du hilabete honetan poliziak eta beti jarrera ona izan omen du. Oraindik ez dago haren kontrako akusazio formalik baina, Jacksonen heriotzari lotuta Murrayk delituzko jokabidea izan zuela adierazten duten zantzuak daude.

AEBetako Drogen kontrako Departamentuko (DEA) agenteak medikuak Las Vegasen (Nevada) daukan etxean sartu ziren atzo epailearen aginduz, Murrayren kontra premeditaziorik gabeko erailketa karguak aurkezteko.

Antzeko miaketa egin zuten iragan ostegunean medikuak Houstonen (Texas) dituen bulegoetan eta zenbait objektu eraman zituzten, tartean, zenbait agiri eta disko gogor bat.

Atzoko miaketa poliziak Murrayk haren heriotzaren aurreko gauean musikariari Propofol anestesikoa eman ziola baieztatu ostean etorri zen. Informazio hori gezurtatu egin du Murrayren abokatuak. 2006tik Jacksonen kardiologoa izandakoaren abokatuak esan duenez, hark ez zion kantariari heriotza ekarri zion inolako substantziarik ez errezetatu, ezta eman ere.

Pertsona ospetsuen gaineko informazioa ematen espezializatutako TMZ Interneteko atariak, Poparen Erregearen heriotzaren berri eman zuen lehen komunikabideak, jakinarazitakoaren arabera, Murrayk berak aitortu zion poliziari Jacksoni lasaigarria injektatu ziola heriotzaren bezperan. Komunikabide horrek jasotako adierazpenen arabera, Murrayk zain bidez eta tantaz tantakoarekin eta loak hartu omen zuen kantariaren egoera zaintzen ari zela. Horregatik, TMZ atariaren informazioaren arabera, medikua ez zen ohartu Jacksonen bihotza gelditu zenean.

Artista estatubatuarrak farmako gogor hori jaso ohi zuen ohera joan aurretik, insomnioari aurre egiteko. Poliziak autopsiaren atariko emaitzak jaso ostean esan du Propofol anestesikoa izan zela heriotzaren kausa.Lasaigarri hori Jacksonek Los Angelesen daukan etxean aurkitu zuten.

Propofol lasaigarria soilik medikuentzat egoten da eskuragarri eta zain bidez ematen da. Bihotz-gelditzea eragin dezake albo ondorio gisa, zenbait analgesikorekin konbinatuz gero edo dosi ikaragarria hartuz gero.

Jackson familiak izan zituen Murrayren jokabidearen gaineko lehen susmoak eta berretsi egin du artistaren eguneroko bizitzako hurbileko pertsonekiko konfiantzarik ez daukatela.

Latoyak, Michaelen arrebak, duela zenbait aste esan zuen artista hil egin zutela eta berak badakiela nor diren erantzuleak.
Musikari handiak lasaigarriekin eta anestesikoekin zeukan harremana duela zenbait hamarkada hasi zen. Harentzat lan egin izan duten pertsonen arabera, hainbat izengoiti erabiltzen zituen (Omar Arnold, Joseph Scruz eta Bill Bray, esaterako) botikak errezetarekin lortzeko. Hori legez kanpokoa da erabat.

Michael Jacksonek farmakoak lortzeko egindako irregulartasunen ondorioz, DEA sartu zen poliziaren ikerketetan eta, Murrayren jokabideaz gain, musikariarekin urtetan harremana izandako beste mediku batzuen jokabidea ere aztertuko dute.