musika

Ken Zazpi taldearen Ortzemugak begietan lana itxura hartzen doa. Talde gernikarra Los Angelesen da azken asteetan Rafa Sardinaren estudioan, kantuen nahasketan eta masterizazioan murgilduta. Saio luzeak egiten dituzte egunero Eñaut Elorrietak eta gainontzeko taldekideek baina, tartetxo batean, kantari bizkaitarrak Gaztearekin hitz egin du, Atlantikoaren bestaldean zer moduz dabiltzan kontatzeko.

Uda gogorra izaten ari da Ken Zazpi taldea. Kantu berrien grabazioa Euskal Herrian amaitu zuten eta, ondoren, AEBetara egin zuten jauzi, hiru astez, kantuei forma emateko. Baina dena ez da lana, eta hiriaz gozatzeko aukera ere izaten ari dira: "aprobetxatzen dugu astia; Los Angeles bada musika arloan oso leku bitxia eta kontzertu asko egoten dira; aukera izan dugu kontzertu batzuk ikusteko. Dauzkagun tarteak aprobetxatzen saiatzen gara baina, lanera etorri gara eta horretan gabiltza". Lanak amaitu, "masterra besapean hartu" eta Euskal Herrira bueltatzeko eta maite dituztenekin egoteko irrikaz da taldea, baina azken hilabeteotako lan "gogorraren" emaitzarekin oso gustura gelditzen ari dira.

Zortea eta lana, uztartuta

"Saiatzen gara ateratzen dugun lan bakoitza ahalik eta baldintzarik onenetan egiten; konsziente gara, gainera, ez direla beharbada garai egokiak produkzio hauetarako; produktore batekin, Los Angelesera etorri eta bere estudioan lan egiteko; badirudi poltsikora gehiago begiratzeko garaia dela. Baina guk argi daukagu zuzenekoetan eta horrelakoetan irabazten ditugunak inbertitzea lehenesten dugula hurrengo lanak ahalik eta baldintzarik onenetan egiteko (...). Luxu bat da guretzat garai hauetan horrelako proiektu bat aurrera ateratzea". Ken Zazpi taldekoak "zortedun" sentitzen dira baina "lan handia ere egiten dugu eta konbinazio horrekin saiatzen gara ahalik eta gehien disfrutatzen.

Musikaren mundua "olatu" baten modukoa dela uste du musikari gernikarrak eta uneak aprobetxatzen ere jakin beharra dagoela dio. "Guretzat une hau goxoa da eta daukagun aukera ahalik eta gehien ustiatu behar dugu", esan digu. Taldeak "pasioz" bizi du hau guztia. Zirrara eta ilusioa nabari zaizkio Eñaut Elorrietari ahotsean udazkenean argitaratuko duten diskoari buruz hitz egiterakoan. Eta, hain zuzen ere, Ortzemugak begietan izenburuarekin ilusio hori islatu nahi izan dute. "Nolabait adierazten du begiekin zaila dela gezurra esatea, ondo adierazten dela une horretan sentitzen duzuna... amorrua edo maitasuna izan, ilusioa... Azkenean, Ortzemugak begietan bada ilusioa adierazteko irudi bat. Talde bezala ilusio hori badaukagu eta dei hori egin nahi dugu jendea ilusionatzeko, elkartzeko...".

Luxuzko gonbidatuak

Taldearen "ilusio" horrekin bat egin dute diskoan parte hartu duten luxuzko gonbidatuek. Hitzetan, Joseba Sarrionandia, Maialen Lujanbio, Jon Maia, Julen Gabiria eta Uxue Alberdi idazleen laguntza izan dute eta azken horrek kantu batean ahotsa jarri du, gainera. "Guretzat erreferente diren eta gure mundu ikuskera antzekoa daukaten pertsona horien letrak gure diskoan sartzea aberasgarria izango zela pentsatu genuen", nabarmendu du. Gainera, teklatuetan eta sekuentzietan Joserra Senperenaren kolaborazioa ere izan du taldeak, baita . "Guretzat plazer bat izan da eta kantuak oso ongi gelditu dira (...). Ingurura eskua luzatu eta ingurukoen laguntza jasotzen saiatu gara".

Disko berria aurrekoak baino "landuagoa" izango dela eta estilo aldetik "definituagoa" dela uste du kantari bizkaitarrak: "aurrekoekin konparatuta, beharbada, argiago daukagu zer bilatu nahi dugun eta Rafarekin bigarren aldiz lan eginda nik uste elkar hobeto aprobetxatzen dugula". Soinuari dagokionez, taldeari arriskatzea eta soinu berriak bilatzea gustatzen zaiola nabarmendu du. Argiak lana esperimentazio diskoa izan zen eurentzat eta bertan jorratutako bide berriak "pixkat gehiago definitu" dituzte lan berrirako. "Gauza konkretuagoen bila jo dugu", adierazi du. "Oso melodikoa da, tinbre desberdinak dauzka, gitarra saturatuak, distortsioekin daude kantu batzuk eta gitarra akustikoekin konbinatzen ditugu. Gainera, disko honetan oso instrumentu desberdinak erabili ditugu, tinpaniak, mandolinak, banjoak, akustikoak... eta betiko bateriak baxuak eta abarrak ere bai". Euren musikan ohikoa den euskal musika tradizionalaren ukitua eta ukitu anglosaxoia gehiago definitu dituzte kantu berrietan.

Argiak-Elkar zigiluen elkarlana

Taldeak Argiak zigilua sortu zuen euren proiektuak gauzatu ahal izateko eta Ken Zazpi urte Zuzenean azken lana bide horretatik kaleratu zuten. Oraingoan, ekoizpen handia gauzatzekotan direnez, Elkar diskoetxearekin bat egin dute eta bien indarrak elkartzearen emaitza izango da Ortzemugak begietan. "Gure apustu horretan jarraitzen dugu baina disko honetarako laguntza bilatu dugu", aipatu du Elorrietak. "Gustura gaude, azken batean, buruan geneukana gauzatzen ari delako".

Udazkenerako, kalean

Argitalpen data zehatzik ez du oraindik diskoak baina "urriaren amaiera, azaroaren hasiera" buelta horretarako helduko da ziurrenik. Lehenbiziko singlea, berriz, aste gutxi batzuen buruan iritsiko da. "Irailaren 7an helduko gara Euskal Herrira eta nik uste dut hortik hamar egunera edo izango dela aukera lehen kantua entzuteko".

Grabazio eta nahasketa lan guztiak amaitu eta promozioari eta zuzenekoei ekingo die Ken Zazpi taldeak. Atseden hartzeko aukera handirik ez dute izango baina osatzen ari diren kantu bilduma berriak piztu dien "ilusioari" helduko diote guztiari aurre egiteko. Eta zale guztiak zain dauzkate.

Eñaut Elorrietari egindako elkarrizketa osorik entzun nahi baduzu, egin klik hemen.

Sartu Ken Zazpi taldearen webgune ofizialean.