musika

Bilboko jaietan Kafe Antzokian egongo diren kontzertuen berri eman ostean, jaietako egitaraua iragarri dute gaur. Udalak, Bizkaiko hiriburuko Aste Nagusirako antolatutako musika emanaldiak aurkeztu ditu.

Kontzertuak hainbat gunetan banatuko dira. Karola guneak punta-puntako musika taldeen zuzenekoak hartuko ditu, Abandoibarran musika herrikoia nagusituko da, Plaza Berrian munduko musikentzako lekua egongo da, Bilborocken Euskal Herriko pop eta rock taldeek joko dute eta Areatzan berbenak izango dira nagusi.

Karola gunea

Botika Zaharreko kontzertuen kokapena aldatu egin da eta aurten Karola gunean izango dira talde garrantzitsuenak. 6000 pertsona ingururentzako lekua izango da.

Astelehenean (abuztuak 20), Public Enemy arituko da bertan; asteartean, Ana Torroja; asteazkenean, Celtas Cortos: ostegunean Aste Nagusi Dance ikuskizuna egongo da; ostiralean, Esne Beltza eta larunbateko zuzenekoa oraindik zehaztear dago.

Abandoibarra

Revolver, Ruper Ordorika eta Manuel Carrasco izango dira, besteak beste, Abandoibarran.