Laura Mintegi EH Bilduko lehendakarigaiaren arabera, beste alderdiek soilik "eskuineko" neurri ekonomikoak proposatzen dituzte "kapitalisten interesak bakarrik aintzat hartzen dituztelako" eta "herritarren beharrei muzin egiten dietelako".

Euskal Herriko Unibertsitateko Bizkaiko campusean izan da Mintegi, eta EH Bilduk gazteriaren inguruan dituen proposamenak helarazi ditu.

EH Bilduko lehendakarigaiak gazteen arteko langabezia tasak "asko arduratzen" diola esan du: erkidegoko gazteen % 35 langabezian dago.

Politika horiek gizarte zerbitzu, hezkuntza eta osasun arloetako "oinarrizko beharrak" ez dituztela zaintzen esan du eta EAEn hezkuntza sistema "propioa, unibertsala, kalitatekoa eta doakoa" defendatu du.

'Langabezia gutxitzeko neurri zehatzak'

Ezker abertzaleak, Aralarrek, EAk eta Alternatibak osatzen duten koalizioko hautagaiaren iritziz, alderdi politikoek ez dute "gazteen arteko langabezia murrizteko neurri zehatzik" hartzen, "EH Bilduk, ordea, programa zehatza du", esan du.

"Hezkuntzan inbertitzen ez duen herrialde batek arazo larria du", gaineratu du.

35 orduko lanaldia

PPk erretiroa hartzeko adina atzeratzearen inguruan harturiko proposamena kritikatu du eta EH Bilduk, ordea, belaunaldi berriak lan merkatuan sartzeko adina gutxitzea eta 35 orduko lanaldia defendatzen duela azpimarratu du.

"Justizia sozialaren" eta "normalizazio politikoaren" helburuak berretsi ditu, "ezkerreko balioekin, pertsonak ekintza politikoaren erdian ezarriz".

Hauteskundeen inguruko informazioa

Hautagaiak