Futbola

Espainiako 21 urtez azpikoen selekzioarekin Rotterdamen Holandaren aurka jokatu norgehiagoka galdu egin zuen Cesar Azpilikuetak, baina Osasunako atzelariak gola egin zuen gutxienez: "Denbora asko neraman golik egin gabe, profesionala naizenetik eta atzealdeko hegalean jokatzen dudanetik sartu lehendabiziko gola izan zen, baina tamalez ez zuen ezertarako balio izan", esan du Azpilikuetak horren harira.

Dena dela, igandean Valentzian jokatu beharreko partidan jarri du arreta dagoeneko Osasunako eskuin hegaleko atzelariak: "Partida gogorra izango da Valentziak talde handia dauka eta, aurrealdean kalitate itzela dute, Villa Espainiako aurrelaririk onena da eta erraz egiten dute min aurrean. Horrexegatik, Valentzia gure areatik urrun mantentzea da gakoa. Presioa goian egin behar dugu eta indar handiarekin euren bila joan ahal denean, aukerak baliatuz", esan du atzelari nafarrak.