Pilota

Igande honetan, maiatzaren 20an, Xalak eta Martinez de Irujok Bilboko Bizkaia frontoian jokatu behar zuten Buruz Buruko Txapelketako final-laurdenetako partida, baina Xala gaixorik dago sukarrarekin eta partida atzeratu egingo da.

Erabakia Enrepsen Ligako epaileak hartu du: “maiatzaren 20rako aurreikusita zegoen final-laurdenetako Xala-Martinez de Irujo pilotarien arteko partida bertan behera geratzen da. Norgehiagoka beste data baten jokatzeko baimena ematen dut, beti ere araudiak dioen epeak errespetatuz”.

Araudiak kasu hauetarako epe batzuk ezartzen ditu:

Data berria ezarriko da partida hau jokatu ahal izateko, baina hurrengo jardunaldiko edo faseko lehen partida baino lehen jokatu beharko da.

Data berriak ez ditu hurrengo jardunaldiko edo faseko partiden datak aldatuko.

Data berriak bi pilotariei errekuperatzeko epe bera eskaini behar die hurrengo faseko edo jardunaldiko lehen partida jokatu aurretik.