Saskibaloia

Bizkaia Bilbao Basketek gaur jaso du Eurocupeko lehen porrota. Last 16ko bosgarren ihardunaldian iritsi da porrot hori eta Benettonen aurka izan da 68-72ko emaitzarekin.

Bi taldeek gogoz ekin zioten partidari. Bizkaiak hirukoa sartu zuen hasi eta segidan, baina Benettonek ez zuen gutxiago izan nahi eta beste hiruko batekin erantzun zion (3-3). Ondoren, italiarrak nagusitu ziren eta abantaila hartzen hasi ziren (3-9). Dena den, Bilbao Basketek azkar erreakzionatu zuen eta aldeak murrizten hasi ziren (13-16). Hala eta guztiz, bizkaitarrek desabantailarekin bukatu zuten lehen laurdena (15-18).

Bigarren laurdenean indartsu kantxaratu zen Bilbao Basket eta bi minututan aurrea hartu zuen markagailuan (20-18). Orduan hasi zen abantailak lortzen Katsikarisen taldea (27-22), baina italiarrek ez zuten etsi eta aurkariarengana asko hurbildu ziren. Bizkaia puntu bakarreko abantailarekin iritsi zen atsedenaldira (34-33).

Atsedenalditik bueltan Bilbao basket lokartu egin zen eta Benettonek aurrea hartu zuen (34-36). Dena den, Bizkaiak azkar erreakzionatu zuen eta abantaila hartzen hasi zen, 9 puntuko abantaila izatera ere iritsi zen talde bizkaitarra (46-37). Bazirudien garaipena bideratuta zutela bizkaitarrek, baina italiarrek gogor jokatu zuten eta hirugarren laurdena berdinduta bukatu zen (53-53).

Katsikarisen taldeak ez zuen ondo hasi azken laurdena. Benetton izan zen nagusi hasierako minutuetan eta laurdenaren erdialdean (35. minutuan) italiarrak aurretik zeuden 56-58. Ondoren, nahiko berdinduta joan zen partida. Amaierarako bi minutu falta zirenean Bilbao Basket hirugatik galtzen ari zen eta Warrenen hiruko batekin partida berdindu zuen etxeko taldeak (65-65). Azken minutuan hobeto jokatu du Benettonek eta garaipena lortu du 68-72ko emaitzarekin.

Fitxa teknikoa:

68 - Bizkaia Bilbao Basket (15+19+19+15): Javi Rodriguez (5), Blums (9), Warren (11), Hervelle (8) y Moiso (6); Salgado (6), Seibutis (7), Mumbrú (2), Markota (-) eta Banic (14).

72 - Benetton Basket Treviso (18+15+20+19): Rivers (11), Kus (11), Hackett (12), CJ Wallace (2), y Montejunas (9); De Nicolao (3), Hukic (10) y Nicevic (14).