Saskibaloia

TAU Ceramica Baskoniak Fernando Buesa Arenan jokatu zuen ACBko finaleko lehen partida Regal Bartzelonaren aurka, eta ezin izan zuen etxean garaipena lortu 80-82 galdu baitzuten.

Partida Racocevicen saskiratze batekin hasi zen (2-0), baina azkar etorri zen Barçaren erantzuna eta bi taldeak markagailuan txandakatzen ziren. Lehen laurdenaren erdialdea pasa ondoren markagailua berdinduta zegoen (10-10). Orduan etorri zen TAUren erreakzioa eta 11-0eko partziala lortu zuen (21-10). Azken minutuetan hobeto jokatu zuen etxeko taldeak, eta lehen hamar minutuak TAUren aldeko 21-15eko emaitzarekin.

Bigarren laurdena erritmo biziarekin hasi zen, nahiko berdinduta. Baina epaileek kirolez aurkako falta adierazi zioten jokaldi baten eta Bartzelona puntu bakarrera jarri zen (25-24). Ondoren, Baskoniak erreakzionatu egin zuen, baina Bartzelona eroso zegoen eta atsedenaldirako hiru minutu falta zirenean Lakovicek bi hiruko jarraian sartu eta Barça aurretik jarri zuen (35-36). Bartzelona nagusi izan zen azken txanpan, eta segundo gutxiren faltan Anderssenek hirukoa sartu eta atsedenaldira aurretik joan zen Bartzelona (37-43).

Atsedenaldia eta gero, Bartzelonak sartu zuen lehen saskiraketa, baina Vidalek hiruko bat sartuz katalanen partziala apurtu zuen (40-45). Pixkanaka, TAU jokoa hobetzen hasi zen eta laurdena bukatzeko lau minuturen faltan Racocevicen hiruko batek aspaldiko partez aurretik jarri zuen talde gasteiztarra (49-48). Oso berdindua izan zen laurden hau, eta katalanen aldeko abantailaz bukatu zen hirugarren laurdena (56-59).

Azken laurdenerako dena airean geratu zen. Bartzelona TAU baino hobeto hasi zen laurden honetan, baina gasteiztarrak kemen handiarekin eta Lucasen hirukoei esker asko hurbildu ziren markagailuan. Laurdenaren erdialdean emaitza 68-69koa zen katalanen alde. Asko berdindu zen partida azken minutuetan. Partida amaitzeko bi minuturen faltan Mickealen hiruko batek berdinketa ezarri zuen markagailuan (76-76). Azken minutuak eroak eta beroak izan ziren. Partida bukaerarako 17 segundoren faltan TAU aurretik zen markagailuan (80-79), baina bi segundoren faltan Basilek hirukoa sartu zuen eta partida erabaki zuen (80-82).

Azkenean, TAUk galdu egin zuen 80-82ko emaitzaz eta Bartzelonak abantaila hartu du finalean (0-1).

Fitxa teknikoa:

80-TAU Ceramica (21+16+19+24): Prigioni (2), Rakocevic (19), Vidal (9), McDonald (10), Splitter (18) -hasierako bostekoa-, Mickeal (5) Teletovic (11), Lucas (6).

82-Regal Bartzelona (15+28+16+23): Lakovic(13), Basile (3), Navarro (11), Andersen (21), Santiago (9)-hasierako bostekoa-, Vazquez (12), Ilyasova (8), Grimau (3), Sada (2).