Txirrindularitza

Mark Cavendish (Columbia) britainiarrak irabazi du 4h16:13ko denborarekin Italiako Giroko bederatzigarren etapa. Txirrindulariek hamar itzuli egin behar izan dituzte Milan hiriko zirkuituan. Gaurko etapak ez zuen sailkapen nagusian inolako eraginik tropelak eta antolakuntzak hala erabakita.

Euren segurtasuna arriskuan zegoela iritzi zioten txirrindulariek eta etapa ez korritzeko mehatxua bota zuten. Azkenean akordio batera heldu ziren: etapa neutralizatua izatea eta abiadura eta segurtasunaren arteko bateragarritasuna. Danilo Di Lucaren lidergoa, beraz, ziurtatuta zegoen.

Helmugara heltzeko hamar kilometroren faltan erasora egin zuen Thomas Voecklerrek, baina Garminek lanean jarri zen tropelean eta bere ihesaldiak minutu eskasa iraun zuen.

Hainbat txirrindulari, Di Luca tartean, ez ziren esprintaren lehian sartu. Cavendish izan zen onena. Davis eta Farrar bigarren eta hirugarren sartu ziren, hurrenez hurren.

Astelehen honetan atsedena hartuko du Giroak astearteko etapa nagusiari aurre egin aurretik (262 kilometro Cuneo eta Pinerolo artean). Lehen mailako bi mendate gainditu behar izango dituzte.