Literatura

Erlea kultur aldizkari berria aurkeztuko dute ostegunean Donostiako Kursaalen, 11:30etan. Aldizkaria Euskaltzaindiak argitaratuko du eta Bernardo Atxaga idazle eta euskaltzain osoa da zuzendaria. Pamiela argitaletxea arduratzen da edizioaz eta diseinuaz.

Arduradunek jakinarazi dutenez, Erlea aldizkaria Euskaltzaindiak abian jarri duen egitasmoa da eta Akademiaren eta kulturgintzaren arteko lotura sendotzea du helburu. Erlea literaturarekin lotutako aldizkaria da eta lau hilabetez behin argitaratuko da, Bernardo Atxagaren zuzendaritzapean.

Lehen zenbakian parte hartzen dutenen zerrenda oparoa da: Kolesti Agirresarobe, Kepa Altonaga, Pablo Antoñana, Jon Arano, AureliaArkotxa, Joxean Artze, Mikel Asurmendi, Jon Aurre, Marisol Bastida, Frank Bergon, Harkaitz Cano, William Douglass, Irati Elorrieta, Miel A. Elustondo, Estibalitz Ezkerra, Aritz Galarraga, Asun Garikano, Jacinto Iturbe, Joxemari Iturralde, Koldo Izagirre, Xabier Kintana, Mariasun Landa, Monique Laxalt, Bruce Laxalt, Anjel Lertxundi, Xabier Lete, Karlos Linazasoro, Ania Miner, Victor Moreno, Toño Muro, Mari Jose Olaziregi, Lourdes Otaegi, Gloria Totoricagüena, Kirmen Uribe, Andres Urrutia, Gabriel Urza Laxalt, Justin Webster eta Iban Zaldua.

Bestalde, ostegunean bertan, iluntzeko 19:00etan, Euskaltzaindiak bere sorreraren 90. urteurrena dela-eta antolaturik, "Paradisua, katuak eta abar" emanaldi artistikoa eskainiko dute Donostiako Kursaalen Bernardo Atxagak eta Juan Carlos Perezek.

Emanaldia dohainik da eta bertara joan ahal izateko gonbit-txartela beharrezkoa izango da. Emanaldia egingo den aretoaren edukiera mugatua da, eta hortaz, tokiak agortu arte banatuko dira gonbit-txartelak. Gonbit-txartelak Euskaltzaindiaren webgunean eska daitezke, bihar arte. Ostegunean ere gonbit-txartelak jaso ahal izango dira, tokiak bete arte, arratsaldeko 17:00etatik aurrera, Kursaaleko txarteldegian.