Kultura

Getxoko Jazz Jaialdiaren bigarren egunak balantze positiboa merezi du talde hasiberriei dagokienez. Getxo Antzokiko plazan, Skunk Projectek, Tony Vaquer pianista buru den laukoteak, gerturatutako publikoa liluratuta uztea lortu zuen. Bere konposizioen kalitateak eta agertokian erakutsitako grinak McCoy Tynerren eragin osasuntsua aditzera eman zuen.

Areto nagusian, Vitale, Magatelli, Winfield italiar-daniar hiukoteak, lehiaketaren barneko taldeak, batasun egonkorra eta ideia originalak aurkeztu zituen. Baina bibrafono, kontrabaxu eta bateriaren nahasketa ezohikoa arraro samarra gertatu zen entzuleriaren zati handi batentzat. Hala ere, musikoen kalitateak eta euren artean sortu zuten elkarrekintza indartsuak kontzertu interesgarria izatea ahalbidetu zuen.

Bestetik, Omar Sosa konpositoreak, gaueko izarrak, musika etnikoaren errezitaldi artatsua eskaini zuen, pianoarekin bat-bateko jardunen tanta apur batzuekin. Dena den, iragarritako musika karibear eta afrikarren bat-egitek nahasketa eragin zuen; izan ere, armonikoki nahastea lortu ez zuten musika afrikarraren eta kubatarraren zatien justaposizioa izan zen.

Ikustear dagoena

Gaur Biotz Alai plazak gainezka egingo du Michel Camilo pianojolearekin, jazz latindarraren egungo interpretatzailerik ospetsu eta sutsuenetako. 2002an Getxon lortutako arrakastaren ondoren errepikatu egingo du, lehiaketan parte hartuko duen Points laukote txekiarrak, gogokoenetako batek, jo ostean.

Bihar Biotone talde poloniarra arituko da, Spyro Gyra legendazko fusio taldearen txanda izan baino lehen. Igandean, jaialdiaren bosgarren egunean, euskaldunen lehengo agerpena izango da. Miguel Salvador gitarristaren laukoteak bere lehengo diskoa aurkeztuko du Hirugarren Milenioko sailean. Gero, Biotz Alaik festa-jantzia hartuko du taldekako lehiaketaren irabazlea aurkezteko. Azkenik, Getxoko Jazz Jaialdiaren 33. edizioa Paquito D''Rivera saxofonista kubatarraren emanaldi bikainarekin bukatuko da, zeinek Chano Dominguez pianista cadiztarrarekin batera joko duen. Baina saio hauen inguruko informazioa asteburuan zehar eskainiko dizuegu. Ongi ibili.