Kultura

Bono liderra duen laukoteak bandaren hamabigarren diskoa argitaratu du gaur, otsailak 2. Momentuz, hiru emanaldi bakarrik konfirmatu dituzte: uztailaren 10an eta 11n Pariseko Estade de Francen arituko dira eta, 15ean, Nizan.

Lan berri honen aurkezpen bira datorren ekainaren 29an Bartzelonan hasi zitekeela argitaratu den arren, Paul McGuinnes bandaren ordezkariak adierazi du diskoa plazaratu arte ez dutela kontzertu berrien datarik jakinaraziko.

1976. urtean sortua, U2 80ko hamarkadatik munduko banda ezagunenetako bat da. 33 urte hauetan, taldeak 170 milioi disko baino gehiago saldu ditu eta, horrela, arrakasta gehien izan duen taldeetako batean bihurtu da. Horren adibide dira irabazi dituen 22 Grammyak, rock artista batek lortu duen zifrarik altuena.

Larry Mullen Juniorrek iragarki bat jarri zuen bere eskolako ohar-taulan eta horri erantzun zioten Bonok (abeslaria eta gitarra-jotzailea), The Edgek (gitarrista, teklatua eta abeslaria) eta Adam Claytonek (baxua). Horrez gain, The Edgeren anaia ere, Dick Evans, taldean sartu zen. Nerabeek osatutako banda horrek ez zekien musikari buruz gehiegi eta, hortaz, The Beatles edo Rolling Stones bezalako talde mitikoen kantuak jotzen hasi ziren. Boskotearen lehen izena Feedback izan zen.

Ondoren, 1977an, The Hype izena hartu zuten eta, azkenean, kontzertu batean zeudela Dickek taldea utzi zuenean, U2 jaio zen. Laukotearen izena, kideek U2 by U2 beraien biografian onartzen duten bezala, behin behineko zerbait bezala sortu zen, aurrerago beste bat jartzeko asmoa baitzuten, baina ospeak eta nazioarteko proiekzioak izen horrekin gelditzea eragin zuen. Gainera, U2 hitz joko bat da, izan ere, ingelesez "you too" bezala ahoskatzen da eta horrek "zu ere bai" esan nahi du.

Lehen urratsak

U2k 1978an eman zuen bere lehen danbatekoa, institutuko azken urtean Paul McGuinnesek (taldearen gaur egungo ordezkaria) antolatutako lehiaketa bat irabazi zuenean. Horrela lortu zuen Island Records diskoetxearekin kontratu bat sinatzea eta urte horretako amaieran lehen albuma kaleratu zuen: Boy. Disko horretako kanturik esanguratsuena "I Will Follow" izan zen, oraindik laukoteak kontzertuetan eskaintzen duten doinua. Single horrez gain, betirako gelditu dira "Another Time, Another Place" eta "Stories For Boys".

Bere hurrengo lanak, October izenekoak, arrakasta gutxi izan zuen eta bandak denboraldi latza pasa zuen. Hala ere, Steve Lillywhite bere ekoizlearekin lanean jarraitu zuen eta War izeneko albuma kaleratu zuen. Lanak laukotearen kantu ezagunenetako bi gordetzen ditu: "Sunday Bloody Sunday" eta "New Year''s Day". Horrela, abesti hauen laguntzari esker taldea gailurrera iritsi zen.

Gorenari eutsi

War albumarekin izandako arrakastaren ostean, U2 estudioetara itzuli zen. Baina, oraingo honetan, Brian Eno eta Daniel Lanois izan ziren ekoizleak. Bien artean taldearen ibilbideari ukitu esperimental bat eman zioten eta, horrela, 1984an, The Unforgettable Fire diskoa kaleratu zuten. Bandaren proiekturik iraultzaileena izan zen, hasierako estilotik guztiz aldendu ziren. Horretarako, kantuak zati melodikoekin bete zituzten eta, gainera, inoiz baino gehiago erabili zuten beraien sormena eta gitarren soinua.

80ko hamarkadako erdialdera, U2k lau disko zituen eta nazioarteko oihartzuna zuen. Bere bira handiei eta The Edgen gitarraren soinu bereziari esker lortutako arrakasta zen. Horrez gain, Bonoren abesteko modu sutsuak eta artistak konposatutako barne-begiradazko kantuek ere eragina izan zuten lan horretan. Ospe hori gailurrera iritsi zen 1987an kaleratu zuten The Joshua Tree lanarekin.

Maisulana

Lortutako arrakastei esker, banda 80ko hamarkadako talde ezagunenetako batean bilakatu zen. Hala ere, disko horren argitalpenarekin iritsi ziren irlandarrak gailurrera.
The Joshua Tree diskoak oso kritika onak jaso zituen. Izan ere, askok maisulana bezala definitu zuten eta egia da lan horretako "With or Without You" eta "I Still Haven''t Found What I''m Looking For" kantuak, adibidez, garai guztietako rock estiloko klasiko handietan bilakatu direla.

Izen bera zuten diskoa eta bira aldizkari garrantzitsuetako portada izan ziren; Times, besteak beste. Horrela, laukoteak AEBtik egin zuen bira dokumental batean filmatzea erabaki zuen eta bidetik, gainera, material berria grabatu zuen.