Zinema

Uztaileko lehen astea filmez beteta dator. Gainerakoak baino lehenago heldu dira izotzetan bizi diren animaliak: Ellie, Manny, Diego, Sid eta Scrat. Gainerako filmak ohi bezala ostiralez helduko dira: Atzerriko Film Onenaren Oscar saria irabazi berri duen Despedidas filme japoniarra, Borja Cobeagaren lehen film luzea eta Delta, intzestua jorratzen duen film hungariarra.

Historiaurreko abenturarik dibertigarrienak Ice Age 3 filmean
Aurreko bi ataletan gertatu bezala, Carlos Saldanha izango da Ice Age filmaren zuzendaria. El origen de los dinosaurios du izena animalia lagun-talde horren abenturak kontatzen dituen hirugarren atalak.

Lagun-taldea banatu egingo da eta bakoitzak bere bideari ekingo dio: mamutek familia bat osatuko dute, tigrea abenturen bila abiatuko da eta erbinudeak ezkurraren atzetik jarraitzen du. Hala ere, Sid hartz nagiari esker lagun-talde osoa batuko da. Abentura berri horretan pertsonaiak lurrazpiko mundu batean barneratuko dira eta dinosauroen jatorria ezagutuko dute.

Irakurri ezazu hemen Ice Age 3 filmaren fitxa osoa.

Umorea eta punta-puntako komikoak Pagafantas filmean
Borja Cobeaga zuzendari gaztea ezaguna da, besteak beste, La primera vez eta Éramos pocos film laburren egile izateagatik. Azken film labur horri esker Film Labur Onenaren Oscar sarietarako hautagaia izan zen. Pagafantas Cobeagaren lehen film luzea da. Komedia garratz horretan parte hartu dute Gorka Otxoa, Julian Lopez edota Ernesto Sevilla aktoreek.

Chemak bere neska-lagunarekin utzi du, zerbait hobea merezi duelakoan. Bikote berri baten bilaketa ez doa bide onetik, harik eta Claudia emakume eder eta dibertigarri batekin topo egingo duen arte. Badirudi ordea, Claudia ez dagoela prest laguntasunaren marra gainditzeko.

Irakurri ezazu hemen Pagafantas filmaren fitxa osoa.

Despedidas, Oscar saria irabazi berri duen film japoniarra
Japoniako zinegilerik entzutetsuenetakoa den Yojiro Takitak gailurra hatz muturrekin ukitu zuen Oscar sarien azken ekitaldian. Izan ere, Atzerriko Film Onenaren Oscar saria jaso zuen Despedidas filmari esker. Zuzendaria bere azken lanean heriotza eta berau inguratzen duten aspektuengana hurbildu da.

Daigo Kobayashik Mika neska-lagunarekin batera Hirano jaioterrira itzultzea erabakiko du. Lan eskaintza arraro bat onartuko du: hileta-zerbitzura iristen diren hildakoak azken agurrerako prestatzea.

Irakurri ezazu hemen Despedidas filmaren fitxa osoa.

Delta, intzestua laku ibaiaren ertzean
Hungariatik datorkigu Kornel Mundruczo zuzendariaren Delta filma. Ezinezko maitasunak eta gizarteko konbentzio zein tabuak gainditzeko zailtasunak jorratu ditu azken lanean.

Anai-arrebek ezinezko maitasun istorio bati emango diote hasiera. Bietako inork ez daki anaiak direnik, ordea. Arazoak etxe berrira joatean hasiko dira. Auzotarrek badakite gazteak anai-arrebak direla eta, ondorioz, harremanaren aurka agertuko dira.

Irakurri ezazu hemen Delta filmaren fitxa osoa.

La última casa a la izquierda, etxera sartu izanaz damutuko zara
Mari eta Paige lakuaren ertzean dagoen etxe bakarti batera heldu berri dira. Kartzelatik ihes egin duen Krug psikopatak, Sadie neska-lagunak, Francis anaiak eta Justin semeak bi neskatoak bahituko dituzte. Bahitzaileek Mari bazterrean utziko dute hil delakoan. Mari beldurtuta dago eta bizirauteko modu bakarra bere gurasoak aurkitzea dela. Zoritxarrez, erasotzaileak bera babestuta sentituko litzatekeen toki bakarrean babestuko dira. Istorio beldurgarriaren berri izan eta gero, Mariren gurasoak ekintzara igaroko dira. Ezezagunok ezker aldean dagoen azken etxera sartu izanaz damutuko dira.

Irakurri ezazu hemen La última casa a la izquierda filmaren fitxa osoa.