El curioso caso de Benjamin Button
Brad Pitten berriena F. Scott Fitzgeraldek XX. mendeko hogeiko hamarkadan idatzitako istorioaren egokitzapena da. Brad Pittek antzezten duen gizona 80 urtereki jaio da eta urteek aurrera egin ahala gaztetuz joango da, horrek eragingo dizkion ondorio guztiekin. Protagonistaren bizitza ezohiko bidaia da, I. Mundu Gerratik hasi eta XXI. mendera arte. Filmean ezohiko gizon horren bizitza kontatzen da, bidean ezagutzen dituen lagunak, amodioak, bizitzako tristurak eta pozak tartean.

Filmak 13 sailetan izendatuta dago Oscar sarietan, tartean Film onenaren, Zuzendari onenaren, Aktore onenaren eta Emakumezko Bigarren Aktore onenaren sarirako. Brad Pittek filma prestatzeko egindako eraldaketa ikusteko otsailaren 6ra arte itxaron beharko da Hegoaldean.

Slumdog Millionaire
Jamal Malik Bombayko auzune txiro batean bizi den umezurtz gazteak ''''¿Quién quiere ser millonario?'''' lehiaketaren bertsio indiarrean parte hartzea erabakitzen du. Guztien harridurarako Jamalek galdera guztiak zuzentasunez erantzungo ditu. Jamal azken galdera erantzun eta 20 milioi errupia irabazteko prest dagoela, atxilotu eta galdeketa egingo diote. Jamalek galdera guztien erantzuna nola zekien azaldu beharko dio poliziari eta horretarako, bere bizitzako zenbait momentu kontatu beharko ditu. Bide batez, lehiaketan parte hartzeko benetako arrazoia zein den argituko da.

Datorren otsailaren 13an iritsiko da Hegoaldeko zinema-aretoetara Indian hainbesteko eztabaida eragin duen filma. Txabolisten Babeserako Batzordeak auzitara eraman ditu filmean parte hartzen duten indiarrak. Salatzaileak Indiako auzune txiroetako egoiliarrak modu txarrean deskribatzen dituela eta titulua indiarrentzat iraingarria dela arrazoitu du. Indian kritika gogorrak jaso baditu ere, nazioartean zenbait sari jaso ditu, besteak beste, 4 Urrezko Globo irabazi eta Oscar sarietarako 10 izendapen jaso ditu.

The Reader
Egia eta adiskidetzearen gaineko istorio kezkagarria da eta aurreko belaunaldiaren hilketak onartzen dituen ondorengo belaunaldiaz ere dihardu. The Reader II. Mundu Gerraren ondorengo Alemanian hasten da. Ikastetxetik etxera dihoala Michael Berg nerabea ondoezik sentitzen da eta Hanna adina bikoizten dion emakumeak etxeraino lagunduko dio. Sendatzean Michael Hannaren bila hasiko da eskerrak emateko. Horrela bien arteko amodio istorio gartsu eta eztia hasiko da. Hannak gogoko du Michaelek berari liburuak irakurtzea eta honela euren arteko erlazioa sakonagoa egingo da. Hala ere, egun batez Hanna desagertu egingo da eta Michael nahasita eta atsekabetuta geratuko da. Zortzi urte beranduago, Zuzenbideko ikasle dela epaiketara joango da eta harrituta geldituko da akusatuen aulkian Hanna ikustean.

Kate Winsletek dramazko emakumezko aktore onenaren Urrezko Globoa eskuratu du film horretan eginiko lanarengatik. Horrez gain, emakumezko aktore onenaren Oscar sarirako izendatuta dago eta filmak orotara bost izendapen jaso ditu, horien artean, film eta zuzendari onenarena. Filma datorren otsailaren 13an estreinatuko da Hegoaldeko zinema-aretoetan.

Watchmen
Alan Moore eta Dave Gibbons britainiarren komikian oinarrituta dago. 80ko hamarkadako mendebaldeko gizarteari eta egungo gizarteari eginiko kritika bat da filma. Misterio eta abenturaren arteko nahasketa konplexua da. 1985eko AEBetako gizartean superheroiak gizarteko egiturako parte dira. Bere lagun ohietako bat erailtzen dutenean Rorschach maskaradun zaindariak ondorio hondagarriak izango dituen konspirazio kezkagarria du buruan. Bere helburua gizateria zaintzea da, baina nork zelatatuko ditu Watchmen deituriko horiek? Superheroiak datorren otsailaren 13an iritsiko dira Hegoaldeko zinema-aretoetara.

Monstruos contra alienígenas
DreamWorks Animation etxeak eginiko azken filma datorren apirilaren 3an helduko da zinema-aretoetara eta 2009an estreinatuko den 3 dimentsioko lehen filma izango da. Berritasun horrek zinemaren historiako mugarri bihurtuko da.

Susan Murphy kaliforniarrari espazioko zaborraz beteriko meteorito bat erortzen zaionean, atzeman eta gobernuko euspen eremu sekretu batera eramango dute. Susan moduan beste hainbat monstruo daude kartzelaratuta. Hala ere, Provoker jeneralak aske utziko ditu herrialdea suntsitzen ari den robot bati aurre egiteko. Bataila irabazi ostean robotaren ontzi inudeari egin beharko die aurre. Galaxhar maltzurrak ordea, bere ontzia itzultzeko eskatuko du edota Lurra suntsituko du bestela. Beraz, monstruoen esku dago mundua suntsipenetik libratzea.

Up
Wall-E filmarekin lorturiko arrakastaren ostean, Disney Pixar hiru dimentsioko animaziozko filmarekin dator. Carl Fredricksen 78 urteko globo saltzaileak bere bizitzako ametsa egia bihurtzea lortzen du milaka globo bere etxeari lotu eta hegan irtetea lortzen duenean. Hala ere, beranduegi ohartuko da bere amesgaiztoetako bat bide lagun izango duela. Russell 8 urteko oihaneko esploratzailea ere berekin doa. Hegoaldeko zinema-aretoetan estreinatuko da filma datorren ekainaren 12an.

Film horren bitartez Disney Pixar binomioak gure gizarteko zaharrek zer kontatu eta erakutsia badutela adierazi nahi dute.

Coraline
''''Slow motion'' teknika hiru dimentsioekin uztartzen duen lehen produkzioa da. Zine zaleek ekainaren 26ra arte itxaron beharko dute filma ikusteko.

Neskato batek bere etxe berrian unibertso paralelo batera sartzeko ate bat aurkitzen du. Hasieran, haurra oso gustura dago unibertso horretako bizimodua hobea baita, baina guztia okertuko da amak betirako geratzeko eskatzen dionean. Coraline bere lehenagoko bizimodura itzultzen saiatuko da bizilagunen, hitz egiten duen katu baten eta bere ausardiaz.