Zinema

Atzo agindu nuen Cuore momentuak itxaron beharko du, jaiak bezalaxe. Garagardo batzuk edatera irten ginen atzo gauean eta azken egunotan ikusi ditugun pelikulen gorabeherak komentatzeko. 'Urteberri on, amona!' pelikulako lantaldeak Kursaaleko Ni neun antolatu zuen gabon-jaian izan ginen eta Realaren garaipena xanpainarekin ospatu genuen. Baina ezin izan ginen 'Extraterrestre' filmeko lantaldeak antolatutako jaira sartu eta gaueko abentura amaitutzat ematea erabaki genuen, eta etxera txintxo-txingo bueltatzea, gaurko pelikula festarekin jarraitzeko.

Eta sekulako jaia izan dugu Ingalaterrako zinemarekin. 'Wild Bill' eta 'Tyranosaur' zinema sozial hutsa dira, bigarrenaren kasuan modu basatiagoan.

Dexter Fletcher aktorearen lehen filma da 'Wild Bill', oso ondo egindako lana, hain zuzen ere. Ingalaterrako bazterreko auzo tipiko batean kokatzen dugu: gidoiak erritmo bizia du eta bere arma biziena ez da drama hutsa. Bill Wardek zortzi urte eman ditu kartzelan eta auzoa ez da pentsatzen zuen beste aldatu. Bere bi semeak aurrera aurrera ateratzen saiatu dira amaren laguntzarik gabe, duela hilabete batzuk joan baitzen.

Beste aktore batek, Paddy Considinek, drama muturrera darama 'Tyranosaur' lanean. Peter Mullan eta Olivia Colman dira protagonistak eta Sundanceko zinemaldian interpretazio onenari saria eskuratu zuen. Atsekabea, tratu txarrak eta muturrera eramandako biolentzia... agian nekagarriegia. Haizea faltan nabari da, baina momentuz ikusi dugun film bizienetakoa da.