Korrikari jarraipena egingo dio ETB-3k "Ongi Etorri" tartearen bidez

Tuteran abian jarri den Korrika 16. ekinaldiari arreta berezia eskaintzen ari zaio Euskal Telebista. Saio bereziak eta eguneroko tartea izango du Ongi Etorri izenburupean. Egunero jazotzen dena kontatuko du Ana Castrok Korrika bertatik eta blog itxuran ETB-3n ikusi ahal izango da egunero-egunero gauean 23:30ean.
Ongi Etorri honetan ibilbidearen egunerokoa biltzeaz gainera, partaidetza bultzatu nahi da, eta jendeak Korrika lasterketatik bidalitako bideo eta irudiak eskainiko dira.

Horrez gain datozen bi asteetako “EITB Kultura Gaua” saioak Korrikari eskainita egongo dira. Datorren ostiralean, martxoaren 27an, Korrikaren sorrerari erreparatuko diote , orain ia 30 urte nola sortu zen korrika, aitzindariak eta anekdotak bilduko dituzte. Oñatin hasi zen hura eta Euskaltzaindiako burua izan zen aita Luis Villasantek , lehen dorsala eraman zuen Tarte horretan Korrika 1980-200 dokumentala eskainiko dute.

Korrika 1980-200 Euskararen aldeko lasterketaren historia biltzen duen dokumentala eskainiko du.Hainbat ataletan banatuta, Korrikaren sorrera eta historian zehar izan dituen arazoak eta gorabeherak ekarriko dituzte gogora. Gainera, euskaldun berrien testigantzak jasoko dituzte eta euskararen transmisioan AEKk izan duen garrantzia aztertuko dute. Bestalde, lekukoa eraman dutenen sentsazioak, mugaz gaindiko ekimena izateak sortzen dituen sentimenduak eta beste gauza asko kontatuko dira ordubeteko dokumentalean.

Gure kaleetatik bi urtetik behin igarotzen den lasterketa honen xarmak jende ugari liluratu du, bere sorreratik bertatik. Edozein kirol ekitaldik adina edo gehiago hunkitzen ditu parte-hartzaileak hamar egun irauten duen manifestaldi honek. Horren atzean dagoena ezagutzera aterako dira kamerak, Korrikaren liluraren benetako motiboen bila, lekukoa eskutan hartzeak sortzen duen sentsazioaren zergatiak aztertzera. Izan ere, Korrika, euskararen aldeko ekimenik handiena izateaz gain, fenomeno kultural, sozial eta politiko bat da.

Horretan sakondu asmotan, 26 lagunen adierazpenak bilduko dituzte. Korrika sortu zenetik gaur egunera bitarte, lasterketarekin harreman berezia izan dutenak guztiak, izan antolatzaile, politikari, euskaldun-berri edo lekukoaren eroale. Julen Kaltzada, Edurne Brouard, Urtsa Errazti, Xabier Amuriza, Julen Madariaga, Juan Gorriti, Eli Galdos, Jean Haritschelhar, Mari Karmen Garmendia, Teresa del Valle, Karmen Galdeano, Gotzon Hermosilla, Itxaro Borda, Jose Elorrieta, Patxi Gaztelumendi, Martxelo Otamendi, Xabier Alegria, Joan Mari Larrarte, Pello Zabala, Miren Erzilla, Jose Anjel Iribar, Jagoba Manterola, Jakes Bortairu, Julio Ibarra, Fermin Muguruza eta Caroline Philips dira euren esperientzia pertsonalaren berri emango duten protagonistak.

Orio Produkzioak etxeak ekoiztu du dokumentala, Eider Rodriguez eta Eriz Zapirainen zuzendaritzapean. Errealizazioa Guille Sanchez eta Maialen Sarasuaren esku egon da.

Bidaia Intimoak

Hurrengo astea, apirilaren 3an “EITB Kultura Gauak” aurtengo edizioaren bildumarekin batera , egun AEK bizi duen egoeraz , ikasle kopuruaz , estrategiaz ... eta 15 korriketan parte hartu dutenak izango dituzte hizpide Orain arte egin diren klipen errepasoa ere egingo dute.

Ondoren Jon Mayak Orio ekoiztetxearekin egindako Bidaia Intimoak dokumentala eskainiko da.

Jon Maiak zuzendutako Bidaia intimoak dokumentala da Mixele, Rami, Jesus Mari eta Tereixa. Lau pertsona ezezagun, aktore izan gabe eta zinemaren munduarekin inolako loturarik eduki gabe, prest agertu dira Korrika 16ri ekarpen eder hau egiteko. Protagonistak labur-labur aipatzeko esan dezagun Mixele Lapurdin jaio zela, euskaldun, baina ama hizkuntza frantses eskola publikoaren eraginez galdu zuela haurtzaroan. Gaztetan berreskuratu ondoren, gaur egun irakasle dugu Itsasuko AEKn. Rami Aljeriako ber-berea dugu, gaztetan Parisera ikasketak egitera joana. Han ezagutu zuen Goizuetako neska batek ekarri zuen Euskal Herrira eta euskarara, eta gaur egun Goizuetan bizi da, euskaraz. Jesus Marik euskara izan zuen ama hizkuntza, baina txikitan Ermuan eta gero Gasteizen bizitzearen ondorioz, galdu egin zuen euskara, eskolaren eta kaleko lagunen eraginez. Baina euskaldun eta abertzale sentitzen zen eta horrek bultzatu zuen euskara berreskuratzera, soldaduskatik bueltan. Tereixa, berriz, Galizian jaiotakoa da, baina, beste asko bezala, Bilbora etorri zen lan bila. Ikastoletan irakasleak behar zirela jakinda, berehala hasi zen euskara ikasten eta gaur egun Portugaleteko Asti Leku ikastolan dihardu lanean.

Hamaika dira euren modura euskarara hurbildu direnak eta euskaldun asko eta asko lau pertsona hauen bizitzetan identifikatuta sentituko dira, beraiek euskaraz bizi nahi dugunon herrira egindako ibilbidea milaka lagunek egin dutenaren antzekoa izango baita ziur aski. Bidaia intimoak, Jon Maiak zuzendutako eta Orio Produkzioak ekoiztetxeak Korrika 16rentzat egindako dokumentala Bidaia Intimoak apirilaren 5ean, Korrikaren amaierako egunean ETB-1 eta ETB-2n eskainiko da azken kate honetan azpidatzita emango da.