telebista

Alberto Surio Euskal Irrati Telebistako zuzendari nagusiak denboraldi honetarako komunikazio taldeak dituen helburu nagusiak telebista zein irratian entretenimendua eta albistegiak indartzea direla adierazi du.

Irailaren 1etik 6ra bitartean Gasteizen ospatuko den Telebista eta Irrati Jaialdian aurkeztu ditu Alberto Suriok programazioaren ardatz nagusiak. Jaialdi honetan anfitrioi izango da EITB eta bertan, programa estreinaldiak, proiekzioak, mahai-inguruak aditu ezagunekin telebista tailerrak kalean eta zuzeneko saioak izango dira. Omenaldirik ere iragarri da eta sari eta onespenetarako tartea ere izango dute. Telebista orokor guztiek hartzen dute parte eta telebista eta irrati arloko izen ezagunak ere bertan bilduko dira.

Fikzioaren aldeko apustua eta albistegien lidergoa sendotzea

Denboraldi honetan fikzioaren aldeko apustu garrantzitsua egingo du Euskal Telebistak. Udazkenerako prest egongo diren barne produkzioko saioak nabarmentzekoak dira. Uda honetan, esaterako, "Euskolegas" arrakastatsuaren bigarren denboraldia grabatu da. Aurrerapen bat, hain zuzen ere, Jaialdiaren amaierako ekitaldian ikusi ahal izango da, irailaren 5ean. "Vaya Semanita" umore saiotik jaiotako produkzioak pisu batean bizi den hirukotean korapiloak ditu oinarri: Patxi bilbotarraren (Andoni Agirregomezkorta), Alex donostiarraren (Javier Antón) eta Pruden gasteiztarraren (Iker Galarza) kontuak hortxe izango dira, pil-pilean. Horrez gainera, auzoko, lagun eta neska lagunak ere hor ibiliko dira bazterrak nahasten. Patxiren osabak, halaber, Santik (Ramon Barea) zer esan handia izango du.

"Euskolegas"ekin batera "Go!azen"eko neska-mutilak gogotik aritu dira lanean uda guztian ikasturte berrirako telesaila prest egon dadin. 12 atal izango dira ikusgai. Musika udaleku batean gazte talde baten gorabeherak biltzen ditu "Go!azen"ek. Filmeak izan zuen arrakastak ekarri du telesaila. Lan-taldean telesail honen arrakasta iragartzen duten izenak daude. Zuzendaria, esate baterako, Jabi Elortegi, filma ere berak zuzendu zuen. Eskamentu handia du Elortegik "Goenkale" eta "Balbemendi" telebistan, eta, Zorion Perfektu zuzendu ditu zinean. Musikaren produkzioan, berriz, Orfanato filmearengatik Goya saria eskuratu duen Fernando Velazquez aritu da. Aktore gisa, bikain dantzatu eta abesten duten gaztetxo taldea eta lan guztia borobiltzeko izen handiko aktore euskaldunak, Ramon Agirre eta Jose Mari Berasategi.

ETB-1eko beste estreinaldi garrantzitsu bat "Wazemank 2.0" umore saioa dugu. Anjel Alkain buru dela, berarekin arituko dira, besteak beste, Mikel Pagadizabal, Ainere Tolosa, Mikel Laskurain, Iñake Irastorza, Egoitz Lasa eta Jon Iraola aktoreak. "Wazemank 2.0" saioak "Wazemank"en urratsa jarraituko du. Umore freskoa egitea, familia guztiari zuzendutako umorea, ditu helburu nagusi. "Wazemank 2.0" saioan Anjel Alkainek aurreko epeko pertsonaia ezagunenak berreskuratu ditu eta imitazio berri eta dibertituak egingo ditu.

Albistegiei dagokioez, lidergoa sendotzea eta indartzea da ETBren nahia. Aktualitateari tarte gehiago emango diote ikasturte honetan.

Bestetik, kirolik onena ematearen alde, ahalegin handia egiten ari da Euskal Telebista. Ahalegin horren emaitza uda honetan ikusi ahal izan dugu Frantziako Tourrarekin eta Txapeldunen Ligako emanaldiekin. EITBko zuzendaritzak bide horretan jarraituko du aurrera begira ere eta kirol hitzordu garrantzitsuenak eskaintzen saiatuko da.

Kanpo produkzioaren atalean, ETBn zinerik onena izango da ikusgai. "Cine Éxito", "Cine Sin Cortes", "La Noche De" eta "Zinea" tarteetan izango ditugu, besteak beste pelikularik ezagunenak. Eragon, En busca de la felicidad, Diamantes de Sangre eta Harry Potter y el caliz de Fuego ditugu emango diren pelikulen zerrendan. Horrez gainera, Adrian Monk ikertzailearen jarraitzaileak poz-pozik hartuko dute denboraldi berria, arratsaldeetan, "Teleberri" albistegiaren aurretik.

Eguna irratian hasten da

EITBn eguna irratian hasten da. EITBko irrati taldeak nobedade garrantzitsuak prestatu ditu irrati talderako. Hasteko, Radio Euskadiko "Boulevard" saioak hiru zati izango ditu. 06:00etatik 10:00etara albistegia nagusituko da. Solasaldi anitza izango da tarte honetan eta ahots gaituenak hartuko dute parte. Saioaren bigarren zatia magazinaren tartea izango da. Saioaren hirugarren zatian, berriz, lehen aldiz, ordu beteko lurralde deskonexioak egingo dira: Araba, Bizkaia, Gipuzkoa eta Nafarroarako deskonexioak.

Arratsaldean, "Graffiti" 16:00etatik 19:00etara izango da entzugai eta irratsaioa amaitzean, 19:00etatik 20:00etara informazioa eta entretenimendua uztartuko dituen irratsaio berria. Gauean, "Ganbara" informazio eta iritzi saioa izango dugu aste barruan.

Asteburuetan, "Más Que Palabras" saioa izango da orain arte bezala. Irratigintza serioa eta entretenigarria egoki tarteakatzea da saioaren arrakastaren funtsa.

Euskadi Irratiak, bere aldetik, hurbileko albistegia egingo du. Araba, Bizkaia, Gipuzkoa eta Nafarroako berri gertukoenak bilduko ditu. Horrez gainera, arratsaldero 20:00etan albistegi nagusi bat egingo du. Etxeko txikienek ere euren irratsaioa izango dute igandero, eta Euskaldunberrientzat tarte bat prestatzen ari dira.

Radio Vitoriaren 75. urtemuga

Aipamen berezia merezi du Radio Vitoriaren 75. urtemugak. Urte guztian, entzuleekin ospatzen aritu da Arabako irratia urtemuga berezia irratsaioetan sariak banatuz. Urriaren 3an amaituko dira ospakizunak ekitaldi ikusgarri eta deigarriekin. Egun horretan Radio Vitoriako irratsaioak Plaza Berrian egingo dira eta bertan hainbat jarduera izango da. Handiena iluntzean izango da: ekilibrista batek, Zeledon izango balitz bezala, Andra Mari Zuriaren plaza zeharkatuko du.