telebista

Euskararen aldeko ekimenaren baitan, hots, euskara bultzatu eta garatzeko EITB tadeko hedabideek egiten duten ahaleginean, bi saio berri estreinatu dira: "Kerman, Mintzalagun Bila", ETBko hiru kateetan egunero ikusgai izango dena, eta "Ele-alea", Euskadi Irratian astelehen gauero entzungai izango dena. Biek ala biek, euskara dakitenak hizkuntza erabiltzera eta ez dakitenak ikastera animatzeko xedea dute.

Bi saioen aurkezpena egin da EITBren Bilboko egoitzan. Bertan izan dira Ramon Etxezarreta Eusko Jaurlaritzako Kultura sailburuordea, Jose Luis Lizundia EITBko Administrazio Kontseiluko kide eta euskaltzaina, Eugenio Mujika HABEko zuzendaria, Alberto Surio EITBko zuzendari nagusia, Rosa Diez Urrestarazu Euskadi Irratiko zuzendaria, Agustin Ezenarro "Kerman, Mintzalagun bila" programako zuzendaria eta Kermanen pertsonaia hezurmamitzen duen Oihan Vega.

"Kerman, Mintzalagun Bila"

Programa 3Koma ekoizpen-etxeak ekoitzi du eta Kerman Ugarte du protagonista. Kerman ahozko euskara behin betiko menderatzeko helburuz kalera irtengo da. Helburu horrekin, Kermanek liburuak dauden-daudenean utziko ditu eta kale aldera abiatuko da, euskara eguneroko bizimoduan erabiltzeko helburuz: euskaltegian urteetan irakatsi dioten teoria guztia benetan aplikatzeko garaia iritsi zaio Kermani.

Kermanen helburua euskaldun berri guztiak gauza bera egin dezaten animatzea da: lotsak alde batera uztea eta edozer egoera baliatzea euskara hitzetik hortzera erabiltzeko. Izan ere, eroriz ikasten da oinez eta hitz eginez ikasten da hitz egiten.

Oihan Vega Djak egingo du Kermanen papera. "Gaztea Klip" saioan aurkezle lanetan aritzen da Oihan Vega eta, azkenaldian, ETB-1eko "Bi Gira" saioan ere ikusi ahal izan dugu epaimahai-kide gisa.

Era guztietako egoerak eta mintzalagunak

Saio bakoitzean Kerman inguru batean agertuko zaigu (azokan, kiroldegian, botikan, tren geltokian...) eta egoera horietako bakoitzak bere-bereak dituen komunikazio helburuak landuko ditu (norbere burua aurkeztu, zalantza adierazi, desadostasunaren berri eman...)

Kermanek kaleko jendearekin egingo du hitz joaten den toki bakoitzean. Mintzalagun horiek kaleko euskaldunen freskotasuna eta aberastasuna ekarriko dituzte. Nolanahi ere, egoera bakoitzean landuko diren irizpide linguistikoak HABEk euskalduntze prozesurako zehaztuta dituenen arabera aukeratuko dituzte; hartara, programa entretenigarria ez ezik, zorrotza ere izango da.

Saio laburrak eta independenteak

Programa bakoitzak bost minutu iraungo du, ikusteko zail eta astun ez izateko helburuari jarraiki. Hala, egunean hainbat aldiz errepikatuko dituzte ETBren kateetan (1, 2, 3). Gainera, programa bakoitza independentea izango da eta ez da hurrengoa ikusi beharrik izango aurrekoak edota hurrengoak ulertzeko.

Nolanahi ere, atal bakoitza independentea izan arren, eduki didaktikoek izango dute jarraipenik. Hartara, lehendabiziko saioetan egitura eta hiztegi sinpleagoak landuko ditu Kermanek, egoerak ere errazagoak izango dira. Asteak aurrera joan ahala, ordea, zailtasun maila handitzen joango da.

Hezkuntza zorroztasuna

Saioak euskara ikasteko indarrean diren plangintzako irizpideak kontuan hartuta daude taxututa: HABEk "Helduen Euskalduntzearen Oinarrizko Kurrikulua"n jasotako komunikazio helburuak eta hizkuntza trebetasunak oso kontuan hartzen dira.

Hala, atal bakoitzean, protagonistak hizkuntza egitura oso jakinak landuko ditu, betiere egoera arruntetan eta baliagarrietan txertatuta. Izango dituen elkarrizketetan Euskal Herriko txokoak, herritarrak, azentuak eta istorioak agertuko dira. Hala, elkarrizketa horiek helburu bikoitza izango dute: batetik, egoera horietan ohikoak diren akatsak zuzentzea, eta, bestetik, euskaraz mintzatu nahi duenari egoera horietan moldatzeko baliabideak eta makuluak eskaintzea (gramatikaren, hiztegiaren edota esamoldeen aldetik).

"Ele-alea"

Euskara ikasten ari direnei zuzendutako irratsaioa jarriko du abian astelehen honetan Euskadi Irratiak: "Ele-alea". Elea-k "hizkuntza" esan nahi du; alea-k "alea". Alea hitzak elea-ri lotuta esanahi bikoitza eman nahi dio saioaren izenari: pixkanaka eta zerbait aletzea.

Ele-alea: hizkuntza pixkana

Ele-alea: hizkuntza aletzen.

Euskara ikastea gustagarri egin nahi duen saioa izango da. Euskara hitzegitera animatu nahi ditu euskara ikasten ari direnak eta horretarako gonbidatu ezberdinak izango dira. Batzuk ikasle famatuak izango dira, besteak ikasle anonimoak.

Euskaraz bizi, euskaraz mintzatzeko, hizkuntza ikasteko ariketak jarriko dizkiete gonbidatzen dituzten pertsonaia famatuei eta euskaltegiko ikasleei. Era horretan, bere ikasle bezala dituzten bizipenak kontatuko dituzte eta ariketa didaktikoak egingo dituzte irratsaioan zehar. HABEren aholkularitza laguntza izango du saioak ariketa guzti hauek egiterakoan. Hitz berriak ikasiko dira, ulermen ariketak proposatuko dituzte, kantuen esanahiak, hitz korapiloak, esaera zaharrak, umorea... etab.

"Ele-alea" astelehenero izango da entzungai 21:00etatik 21:30etara bitartean.