'Azpimarra' saioarekin arratsaldeko ETB-1eko albiste tartea abian jarriko da. Astelehenetik ostiralera egunero izango da ikusgai 19:15etik aurrera. Hasteko, Ander Arzak eta 'Gaur Egun'eko lankideek eguneko albiste garrantzitsuenen aurrerapena egingo dute eta Ana Ramosek kiroletako gai garrantzitsuenak aipatuko ditu. Jarraian, Maddalen Iriartek eguneko gaiak aztertuko ditu bere tertuliakideekin. Eguneroko tarte horretan bertan Iparraldeko albisteen berri ere emango da 'Iparraldearen Orena'ren eskutik. Eguraldiaren ostean, azkenik, 'Gaur Egun'a hasiko da, beti bezala 20:00etan.Horrez gain, astelehenero, 23:00ak aldera, 'Azpimarra' berezi bat eskainiko da: 'Azpimarra + Gehiago'. Ordu beteko saioan elkarrizketa sakon bat egingo da astero eta ondoren mahai ingurua izango da 'Azpimarra'ko ohiko kolaboratzaileekin.