Ordutegi nagusiko saioak berrikuntzaz josita datoz, hala nola, "Faktoria" magazina. Manu Etxezortu kazetariak gidatuko du goizeko zortzietatik eguerdiko hamabiak arte.
Datorren astelehenean, hilaren 10ean, hasiko den denboraldi berriak aldaketa ugari ekarriko ditu Euskadi Irratiko programaziora. Berrikuntza nagusienak "Faktoria" saioan du eragina, ordutegi eta gidariak aldatu egingo baitira. Euskadi Irratiko magazin nagusia goizeko zortzietan hasiko da aurten, ordu bete lehenago alegia, eta hamabiak arte iraungo du, lau orduko saioa osatuz. Manu Etxezortuk aurkeztuko du.
"Faktoria"ko lehendabiziko zatian informazioa eta iritzia izango dira ardatza aditu eta kolaboratzaile askoren eskutik, eta hamarretatik aurrera helburua entzulea entretenitzea izango da aktualitatea oinarritzat hartuta. Manu Etxezortu irratigintzan eskarmentu handia duen kazetaria izango da saioaren zuzendari eta gidaria. Berarekin batera lantalde berria: Jone Larrañaga, Oihane Yustos, Ainhara Zuazabeitia, Ane Albisu, Gorka Berasategi eta Iratxe Eizagirre.
"Faktoria"ren aurretik, 06:00etatik 08:00tara, irratia eta telebistan ibilia den beste kazetari bat: Iñaki Guridi. Berak gidatuko du "Goiz Kronika" lehen informazio saioa.
Berrikuntzak protagonista ere asteburu goizetan. Arantza Kaltzadak eta taldeak saio berria estreinatuko dute: "Amarauna". Larunbat, igande eta jai egunetan aireratuko da, entzulea sarean harrapatzeko asmotan.
Gauerdiari dagokionez, Nagore Telleria eta Jon Agirresarobe izango dira denboraldi honetan "Dèja vú" saio berritzaileaz arduratuko direnak, beti ere entzule gazteari zuzendu asmoz.
Bere horretan jarraitzen dute azken urteotan sendotu diren saio arrakastatsuak, nola hala: "Aperitifa", Garikoitz Udaberekin, 12:00tik 13:00ra bitartean; "Arratsaldekoa", Arantxa Iturbek gidatuta, 16:00tik-18:00era, eta "Mezularia", Maite Artolaren eskutik, arratsaldeko 18:00etan hasita 20:30ak arte.
