Canal Vascok hiru albistegi eskaintzen ditu eguneko, eta horietariko bat -Canal Vasco News- Amerikako ikusleei zuzenduta dago bereziki. Elkarrizketak eta pil-pilean dauden gaiei buruzko eztabaidak ematen ditu Canal Vascok albistegiekin batera. Canal Vasco EiTB komunikazio taldearen kateetako bat da eta beraz, EiTBren delegazioak, korrespontsaliak eta munduan zehar dauden kazetariak bereak dira ere.

Canal Vascok hurbil-hurbiletik jarraitzen ditu kirolak. Arreta berezia ipintzen du kirol albisteetan eta sakonean aztertzen ditu: futbola, saskibaloia, pilota, txirrindularitza, eskubaloia, mendia, regatak, herri-kirolak. Horrez gain, aisialdiari tarte zabala eskaintzen dio: lehiaketak, talk showak, zinea, kontzertuak, erreportajeak, turismo bidaiak, sukaldaritza... Bestetik, euskaldunek Amerikan utzitako arrastoei jarraipen berezia egiten die.