Bogota.- Atzo iritsi zen Kolonbiako hiriburura Gabriel Maria Inclan Eusko Jaurlaritzako Osasun sailburua, Kolonbiako Euskal Etxea fundazioak gonbidatuta. Euskal Etxeko kideek kolonbiarren eta euskaldunen arteko lehen topaketa antolatu dute egunotan Kolonbiako zenbait herritan. Inclanek Euskal Astean parte hartuko du.

Horrez gain, Gabriel Maria Inclanek osasun gaietarako aholkularitza hitzarmena sinatuko du Bogotako alkatearekin. Bogotan zortzi milioi pertsona bizi dira eta osasun arloko arazo larrienak itxaron-zerrenda luzeak egotea eta ospitaleetan ohe nahikorik ez izatea dira. Akordioa dela medio, Eusko Jaurlaritzak Euskal Herrian egindakoaren berri emango die kolonbiarrei, egoera horiek arintzen laguntzeko.

Bestalde, Osasun sailburua Kolonbiako Osasun ministroarekin elkartuko da, eta, ondoren, euskal abizena duten kongresista eta senatariek sailburuarekin topa egingo dute Kongresuan. Jarraian, Inclanek hitzaldia emango du Bogotako Osasun Idazkaritzan. Ospitaleetako zuzendariak, osasun dekanoak eta Bogotako Osasun Idazkaritzakoak izango dira bertan. Gero Gabriel Maria Inclanen omenez bazkaria egingo da eta bazkalostean lan bilera egingo dute Protokoloa garatzeko. Azkenik, Inclan Cartagenara joango da.

Kolonbiarren eta euskaldunen arteko lehen topaketako programaren barruan, Gastronomia Jaialdia, euskal zinemaren erakustaldia, euskal liburuen aurkezpena eta osasun arloan aholkulari lana egiteko hitzarmena aipa daitezke, besteak beste.

Buenos Aires.- Larunbatean hil zen Argentinako hiriburuan Diego Joaquin Ibarbia Euskal Inmigrazioaren aldeko Batzordearen idazkaria, elkarteko kideetan bizirik gelditzen zen bakarra. Espainiako Gerra Zibilaren garaian, laguntza handia eskaini zien euskaldunei batzordeak, eta, besteak beste, Roberto Ortiz Argentinako presidentea bultzatu zuen, 1940an dekretu bat idatz zezan. Agiri horri esker, Gerraren ondorioz munduan sakabanatuta zeuden euskaldunak Argentinara joan ahal izan ziren.

Euskal Inmigrazioaren aldeko Batzordearen bidez, argentinarrek beren aberriari laguntzen ziotela esaten zuen Ibarbiak, Errepublikaren aberastasuna euskaldunen izen onarekin handituko zutela uste baitzuen. Hori adierazi zuen Eusko Deya aldizkarian, 1940an.

Bestalde, Diego Ibarbia Laurak Bat euskal etxeko ohorezko bazkidea, Euskal Etchea Elkarteko Zuzendaritza Kontseiluko ohorezko epaimahaiko kide, Euskal Ikasketen Amerikako Institutuaren presidente eta Juan de Garay Argentinako euskal fundazioko sortzaile, bultzatzaile eta aholkularia zen. Horrez gain, Argentinako erakundeetan lan egin zuen, eta haietako batzuen aipamen bereziak jaso zituen.

Argazkia: Gonzalo Auza
Iturria: www.euskonews.com

Iruña.- Bihar hasi eta larunbatera bitartean jokatuko dute, Nafarroako etxeen eta elkarteen artean, Munduko Lehen Mus Txapelketa, Reino de Navarra eta El Toro hoteletan, Iruñan. Txapelketa Nafarroako Ostalaritza Enpresa Txikien Elkarteak antolatu du eta hamahiru bikote arituko dira nor baino nor, Venezuelatik, Argentinatik, Mexikotik eta Uruguaitik etorritakoak, horien artean.

Jaiotzez, bizitzez eta jatorriz nafarrak direnek parte hartu ahal izango dute bertan. Horrez gainera, antolatzaileek bisita eta txango batzuk prestatu dituzte egun hauetan egiteko, Gobernuaren Jauregira, Baztanera, Donejakue bidera, Leireko monasteriora, eta Xabierko eta Oliteko gazteluetara, besteak beste.