Rochester-Minnesota.- Gaur hasiko da Rochester-Minnesotako (AEB) Olmsted County Fairgroundseko zelaietan Munduko Sokatira Txapelketa eta, bertan, Euskal Herritik gizonezkoen hiru taldek hartuko dute parte. Gaurkoan, 560 pisuan, bizkaitarrak ariko dira (Erandioko Goiherri eta Laukizko Gaztedi A eta B) eta 680an, gipuzkoarrak (Mutriku), baina bihar denak neurtuko dira 640 kilotan.

Hiru euskal taldeen artean Mutriku da nazioartean arituena, gipuzkoarrak orain dela 32 urte hasi ziren-eta nazioarteko lehiaketetan parte hartzen. Hala ere, badirudi laukiztarrek izan dezaketela dominaren bat irabazteko aukerarik gehien, batez ere 560ko pisuan, nahiz eta iaz, pisu horretan, emaitzarik onena Goiherrik lortu zuen.

Mexiko Hiria.- Gourmet.com guneak ¿Mexikoko zaporeak¿ egin du, Mexikon Argos ekoiztetxeak egindako saioa. Mexikoko goi-mailako gastronomiako ordezkaririk onenak agertuko dira bertan, euskaldun bat edo beste tartean.

Sheraton Centro Historicoko jatetxeko Gabriela Jones, Tezka jatetxeko Bruno Oteiza, Club de Industrialeseko Isabella Dorantes, Fiesta Americana Cancuneko Gerardo Rivera eta Bakea jatetxeko Vicente Etchegaray izango dira saioko protagonista nagusiak, eta, 176 ataletan, sukaldari gazteek argi utziko dute primerako jakiak egiteko duten abilezia.

Mexiko.- Atzo inauguratu zuen Xabier Ariztik pintura erakusketa Casa Rolandin, Mexikoko Polanco herriko Masaryk kaleko 110. zenbakian. ¿Barro y algo más¿ erakusketak 35 margolan ditu pastel teknikaz eginak. Koadro guztiek mexikar estilo koloretsua daukate, eta, besteak beste, udariak, sandiak edota lorontziak ikus daitezke.

Erakusketara, Ariztiren senitartekoak, lagunak, kazetariak eta artezale ugari hurbildu ziren. Margolariaren eta erakusketaren inguruko informazioa, edota erakusketa, hiriko edozein tokitara zabaldu nahi duenak, Xabier Ariztirekin jarri beharko da kontaktuan jarizti@yahoo.com.mx helbide elektronikora mezu bat bidaliz. Gainera, erakusketako koadroen argazkiak ikus daitezke http://www.vascosmexico.com helbidean.