Gipuzkoako urrezko dominarekin abeslari donostiarrak tradizioa lantzeko egindako ahalegina eta aldi berean, garai bateko abestiak egungo belaunaldiei helarazteko egindako lana eskertu nahi diote. Hala jakinarazi du Foru Aldundiko Kontseiluak.

Markel Olano, Gipuzkoako ahaldun nagusiak esan du, Laboa, zalantzarik gabe, euskal kulturaren ikonoetako bat dela eta gipuzkoar guztien omenaldia merezi duela.

Donostian jaio eta bizi den abeslariaren ibilbide eta diskografia goraipatu ditu Olanok, erabakia arrazoituz. Euskal kantugintzan oso estimatua da Laboa, abestietan ahots eta letra paregabeak eman dituen gizona.

Urrezko domina abenduaren 20an egingo den ekitaldi batean emango diote artistari. Izendapen honen berri ematerakoan Aldundiko ordezkariek jakinarazi dutenez, Laboa bera eta bere familia gustura agertu dira albistea jakin dutenean eta erantzukizun handiz jasoko omen dute saria.