Iaz mila urte bete ziren Antso III.a Iruńeko errege izendatu zutela, eta Mauleko herritarrek 2004ko uztailaren 25ean eta abuztuaren 1ean antzeztu zuten Antso Handia pastoralarekin omendu nahi zuten nafar errege handi hau. Antso III.ak Garonatik Dueroraino eta Galiziatik Kataluniaraino hedatu zuen bere aitaren erresuma txikia eta, horretarako, musulmanen aurka borrokatu zen, baina ezpataren indarraz baino gehiago diplomaziaz eta ezkontzaz baliatu zen. Antso Handia kulturaz ere arduratu zen: arte erromanikoa bultzatu zuen, Donejakue bidea sustatu, eta Eliza berritzen lagundu zuen Clunyko beneditarren eskutik. Jean-Louis Davant zuberotar idazleak alderdi horiek guztiak jaso zituen bere testuetan. Antso Handia lehen pastorala dute mauletarrek XXI. mendean. Dena dela, ez dira urte asko Maulen azken pastorala ikusi zela: Abbadia Ürrüstoi, 1990ean taularatua Zuberoako ikastolek. Euskal Telebistak, urtero legez, udan grabatu zuen Zuberoako pastorala, eta Aste Santuan emitituko du, jatorrizko bertsioan eta euskara batuan azpidatzita. |
