EAEko 100.000 funtzionario daude deituta gaurko ELA, LAB eta STEE-EILAS sindikatuek deitu duten lau orduko lanuztera. Sektore publikoan iragarri dituzten murrizketen aurkako eta kalitatezko zerbitzu publikoen aldeko deialdia da.

Zehazki, udaletako, foru aldundietako eta erakunde autonomikoetako langileak, Estatuko Administrazio Orokorretako langileak eta Correoseko langileak daude deituta.

Joan den urtarrilean Eusko Jaurlaritzak funtzionarioen soldatetan iragarritako murrizketen aurkako protestak izango dira. EAEko Administrazioko 67.000 funtzionariori eragingo dien lan-baldintzen murrizketa onartu zituzten, eta, neurri horrekin, Jaurlaritzak 95 milioi euro aurreztu nahi ditu 2012an.

Hori horrela, Jaurlaritzak bertan behera utziko ditu 2012an borondatezko erretiroagatik ematen ziren sariak, errelebo kontratuei buruzko konpromisoak, jardunaldia murriztuta soldata murrizketarik ez izateko aukera eta 65 urte betetzen dituzten funtzionarioei lanaldia luzatzeko aukera.

Euskadiko hiru hiriburuetan manifestazioak deitu dituzte 12:00etarako: Bilbon, Arriaga Plazan; Donostian, Boulevardean; eta Gasteizen, berriz, Andre Maria Zuriaren plazan.

''Gutxieneko zerbitzuak, gehiegizkok''

Erietxeetan, jaiegunetan izan ohi dituzten neurriko zerbitzu minimoak ezarri dituzte, eta garraioetan, % 30eko zerbitzu minimoa ezarri da.  Sindikatuek ''gehiegizko''tzat jo dituzte, eta helegitea aurkeztu dute.

Metroko lanuzteak ere
Funtzionarien lanuzteak Metro Bilbaok ostegun honetarako ere deitu duen lanuztearekin bat egiten du.

Giro ikusgarria Miribillako Bilbao Arenako harmailetan.

Hotzaldiak Araban eta, batez ere, Gasteizen eragin ditu asteazken honetan arazo gehien. Joan den astean hotzaldi siberiarrarekin gertatu bezala, arazo handienak bertan jazo dira, elurra egin baitu 06:00etatik etengabe, eta kaleak eta errepideak izoztu egin baitira.

Aurreikuspenen arabera, eguerdian zen elurra erortzekoa, baina goizean goiz hasi du botatzen. Elurteak agintariak ezustean harrapatu dituela eta gatza bota gabe zegoela zuritzen hasi dela nabarmendu dute goizean; baina Marian Castellanos herritarren segurtasunerako zinegotziak ezeztatu egin du.

Zinegotziaren arabera, momenturik larriena 8:00 eta 8:30 bitartean izan da, eta zazpi istripu gertatu dira tarte horretan. Gainera, ibilgailu batek 47 urteko gizonezko bat harrapatu du, eta, erorialdien ondorioz, bost pertsonak hausturak izan dituzte.

Udalak larrialdi planeko lehenengo fasea ezarri du, baliabide guztiak martxan jartzeko.

Arabako gainontzeko lekuetan ere eguna zaila izan da, batez ere, errepidera atera behar izan dutenentzat. Arabako Aldundiak ere larrialdi plana abiatu du, errepideak zaintzeko, eta elurra kentzeko 15 makina ibili dira atzera eta aurrera. Hala ere, hogei bat istripu izan dira, gehienak txapa istripuak, eta hiru lagun arin zauritu dira. Istripu larriena Ilarratzan izan da, Gasteiztik zortzi kilometrora. Bertan zazpi autok elkar jo dute.

Trafikoko Mahai Teknikoa bilduta
Trafiko zuzendariaren arabera, jendea lanera zihoanean bota du elurra, eta hotzaren ondorioz, izoztu egin da. Horregatik sortu omen dira arazo gehienak. Trafikoko Mahai Teknikoa bilduta, Arabako Ertzaintza, Gipuzkoako eta Bizkaiko trafiko unitateekin indartzea erabaki dute.

- Fitxa teknikoa:

2 - Bartzelona: Pinto; Puyol, Mascherano, Pique, Abidal, Thiago, Xavi, Cesc (Iniesta, 90+2. minutuan), Cuenca (Tello, 89. minutuan), Messi eta Alexis (Dani Alves, 86. minutuan).

0 - Valentzia: Diego Alves; Miguel, Rami, Víctor Ruiz, Jordi Alba, Albelda (Parejo, 85. minutuan), Banega (Tino Costa, 68. minutuan), Feghouli, Jonas (Piatti, 79v), Mathieu eta Aduriz.

Golak: 1-0: Cesc, 16. minutuan. 2-0: Xavi, 81. minutuan.

Athleticek Bartzelonaren aurka jokatuko du Errege Kopa finala, Guardiolaren taldeak 2-0 gainditu baitu Valentzia finalerdietako itzuleko neurketan. 1-1eko garrantzitsua eskuratu zuen Kataluniako taldeak joaneko norgehiagokan eta Cescek eta Xavik kanporaketa erabakita utzi dute Camp Nou futbol zelaian. 2009ko Errege kopa finala errepikatu egingo da beraz Bartzelonaren eta Athleticen artean.

Neurketako aurreneko minutuetan Valentzia jaun eta jabe izan da Camp Nou futbol zelaian, baina Cescek 15. minutuan lortutako golak izoztuta utzi ditu Unai Emeryren mutilak. 1-0ekoa kolpe gogorra izan da Valentzia taldeko jokalarientzat eta Bartzelonak partidaren kontrola bereganatu egin du.

Blaugranek kanporaketa erabakita uzteko abagune argiak izan dituzte atsedenaldia baino lehen. Cesc Fabregasek hiru aukera eder izan ditu eta Messi bi. Xavik, Cuencak eta Alexisek ere saikaerak egin dituzte, baina Diego Alves atezainak gelditu erabakigarriak egin ditu.

Bigarren zatiako aurreneko minutuetan Valentziako jokalariek aukera bikainak izan dituzte. Hala ere, Pinto atezaina bikain egon da ate azpian eta Emeryren taldeak intentsitatea jaitsi egin du. Feghoulik bigarren txartel horia ikusi du etaValentzia hamar jokalarirekin gelditu da. Xavik erabakita utzi du kanporaketa81. minutuan gol ederra lortuta.

Ingalaterrako selekzioako teknikari gisa dimititu egin du Fabio Capello italiarrak, futbol federakuntzak ezagutzera eman duenez. Capelloren dimisioa, Ingalaterrako futbol federakuntzarekin liskarra izan eta gero heldu da. Federakuntzak John Terry kapitainari besokoa kentzeagatik entrenatzaile italiarrak desadostasuna azaldu zuen eta gaur dimitetzea erabaki du.

Hotzaldiak eta elur-denboraleak hobera egingo dute zertxobait ostegunean, asteazkenean arazo ugari eragin ostean, batez ere, Araban.

Ostegunean tenperatura apur bat igoko da eta elur-kotak apurka-apurka gora egingo du, Euskalmet Meteorologiaren Euskal Agentziaren iragarpenaren arabera.

Hala ere, gauera arte ez da 500-700 metroraino igoko da; goizean goiz elurra 0-100 metrotik gora egin dezake. Goizean zerua oso hodeitsu egongo da eta han-hemenka prezipitazio txikia egingo du.

Arratsaldean atertu eta ostarteak zabalduko dira. Hala ere, izotza botako du.

Hiriburuetako tenperaturei dagokienez, Bilbon gradu 1 espero da gutxienez eta 7 gehienez, Donostian -2 gutxienez eta 5 gehienez, Gasteizen -4 gutxienez eta 2 gehienez, eta Iruñean -6 gutxienez eta 2 gehienez.

Ostegunean eta ostiralean izotzagatik ezarritako abisu horia mantenduko dute, baina ostiralean tenperaturak apur bat igoko dira.

Bestalde, larunbatean, zerua lainotuta egongo da, tenperatura minimoak gorakada txikia izango dute eta izotzak jarraituko du.

Emakume bat eta haurtxo bat Gurutzetako ospitalera eraman dituzte, Berrizko baserri batean piztu den su batean kea arnastu ondoren, Eusko Jaurlaritzako Herrizaingo Sailak jakitera eman duenez.  Sutea asteazken honetan piztu da, 17.00ak aldera, ustez baserriko kaxa elektrikoan.

Ertzaintza, suhiltzaileak eta osasun zerbitzuak bertaratu dira, eta, hasiera batean Durangoko anbulategira igorri badituzte ere, bertatik erietxera eraman dituzte emakumea eta haurtxoa. Suak hainbat kalte eragin ditu baserrian.

- Fitxa teknikoa:

93 - Gescrap Bizkaia (34+18+20+21): Jackson (15), Vasileiadis (19), Mumbru (16), Hervelle (10), D'Or Fischer (11) -hasierako bostekoa-; Raul Lopez (5), Josh Fisher (-), Blums (-), Grimau (5), Banic (6) eta Mavroeidis (6).

69 - Real Madril (14+12+25+18): Llull (4), Pocius (1), Carlos Suarez (-), Mirotic (18), Begic (6) -hasierako bostekoa-; Sergio Rodriguez (5), Carroll (8), Singler (8), Reyes (2) eta Velickovic (17).

Miribillak beste gau magiko bat bizi izan du, Bilbao Basketek 93-69 jipoitu baitu Real Madril Euroligako norgehiagokan. Katsikarisen mutilek, basket average-a alde ipintzea lortu dute gainera eta multzoko bigarren sailkatuak dira.

Bilbao Basketek partzial garrantzitsua lortu du hasierako minutuetan (10-0) eta Lasoren taldea ezinean ibili da erasoan. Mumbruk eta Aaron Jacksonek ederki gidatu dute Gescrap Bizkaiaren erasoa eta markagailaun 25-8koa jarri dute. Lehenengo laurdenean taldeak egindako lan bikaina ezinbestekoa izan da, 20 puntuko aldea lortu baitu Bilboko taldeak (34-14).

Bigarren laurdenean Katsikarisen mutilek 20 puntuko aldea ederki mantendu dute markagailuan. Mavroeidis eta Fischer jaun eta jabe izan dira taula azpian eta Madrileko taldeak ezin izan du erantzuna eman. Urruneko jaurtiketetan gaizki ibili dira Lasoren mutilak eta 52-26ko markagailuarekin bukatu da bigarren laurdena.

Real Madrileko saskiratzaileek partidan abiadura sartu dute atsedenaldiaren ostean eta aldea murriztu egin dute markagailuan. Velickovicek puntu garrantzitsuak lortu ditu eta hirugarren laurdenena 72-51ko emaitzarekin bukatu da.

Azkenengo laurdenean Bilbao Basketek erritmoa bizitu egin du eta Miribillako zaleek gozatu ederra hartu dute taldearen jokoarekin. Mirotic eta Carroll markagailuko aldea murritzen saiatu dira, baina Katsikarisen mutilek gogor eutsi dute defentsan eta azken emaitza 93-69koa izan da.

Aurrekontuen Batzordeko ordezkaria den Antonio Gallego Kataluniako PPko diputatuak "tonto" deitu dio Toni Cantóri horrek Kongresuko jesarlekuak erdi hutsik erakusten dituen bi argazki erakusteagatik. Horrez gain, "antzerti mundura bueltatzeko" aholkatu dio diputatuak.

Astearte honetan, legegintzaldi honen lehenengo ohiko Osoko Bilkuran, Toni Cantók Kongresua erdi hutsik erakusten zituen bi argazki igo ditu TWitter sare sozialera. "Gaur hemizikloa nahiko triste dago..." idatzi du mugikorretik ateratako argazkiak ilustratzeko asmoz.

"Esan didatenez, Toni Cantók hemizikloa erdi hutsik erakusten duen argazki bat publikatu du. Ezin daiteke tontoagoa izan -idatzi du Twitterrean- bueltatu zaitez antzerti mundura" erantzun du Antonio Gallegok.

Non zaude orain?

Bitartean, PPko beste diputatu batzuek UPyD alderdiko diputatuaren jarrera kritikatu dute. "Toni Canto: lezio justuak" idatzi du Carmen Rodriguez Maniega asturiarrak.

PPko diputatu hauek Toni Cantó "bere postuan egoten ez den lehena" dela azaldu dute. "Non zaude orain?" galdetu dio Rodriguez Maniegak, "denok plenoan eta zu ez dakigu non".

Inmaculada De Miguel Eusko Jaurlaritzako Justizia Administrazioko Harreman zuzendari ohiak burutu gabeko kontratuen memoriak sinatu zituen behin eta berriro, Eusko Jaurlaritzak Fiskaltzari bidalitako txostenaren arabera.

Ildo horretan, Eusko Jaurlaritzaren iritziz, De Miguel izan zen Justizia Sailean 2000 eta 2009 urteen artean burututako kontratu informatikoen ustezko irregulartasunen arduradunetariko bat. Urte horietan Joseba Azkarraga (EA) zen sailburua.

Hamabost bat kontratutan antzemandako ustezko irregulartasunak argitzeko, Idoia Mendia Justizia sailburuak Eusko Legebiltzarrari dagokion batzordean bere burua aurkeztea eskatu du.

Bestalde, Inmaculada de Miguelek agiri batean azaldu duenez, errealitatea bestelakoa da, eta berak ez zituen ustezko kontratu irregular horiek sinatu.

Inmaculada de Miguelen hitzetan, "lasai dago", baina salaketak piztutako "astindua eta ulertezintasuna" azpimarratu ditu. Izan ere, esleipen kontratu horien sinadura "Administrazio barruko beste maila bati zegokion".

Bestalde, Ibermatica enpresa "harrituta" dago eta konpainiaren aldetik iruzur susmorik ez dagoela azpimarratu du.

Ildo horretan, Eusko Jaurlaritzako Justizia Sailarentzat burututako proiektu guztiak susmotik kanpo daudela esan du enpresak.