Zortzi pertsona zauritu dira, tartean bost suhiltzale, gizonezko bat eta adingabe bat, Bartzelonan izan den leherketa batean. Zauritu diren suhiltzaileetako bat larri dago. Bartzelonako Sarrià-Sant Gervasi auzoan izan da leherketa, arropa-denda batean.

Udalak jakitera eman duenez, eztandaren hedatze-uhinak harrapatu ditu zortzi zaurituak. Suhiltzaileetako bat larri dago, beste laurak ez hainbeste, eta gizonezkoak eta haurrak zauri arinak dituzte.

Arropa-dendan piztu den sutea itzaltzea lortu ondoren gertatu da eztanda.

Langile bat zauritu da abiadura handiko treneko lanetan, Zornotzan, LAB sindikatuak jakinarazi duenez. Langileak kamioi batean lanean ari zen, kamioa irauli denean.

Ertzaintzak, gaur, 10:40an gertatutako istripua baieztatu du, langileak gidatzen zuen iraulki-kamioia irauli denean.

Langilea Galdakaoko ospitalera eraman dute. Langilea gipuzkoarra da (F. J. H. P.) eta 44 urte ditu, Efe albiste agentziak jakinarazi duenez. LAB sindikatuaren arabera, langileak Moyua eraikuntza enpresan lan egiten du.

LABek bere babesa eta elkartasuna adierazi dio zurituari eta zaurituaren langile eta lagunei; halaber, abiadura handiko lanetan gertatzen diren "etengabeko istripuak" salatu ditu.

Gipuzkoako Aldundiak suhiltzaileek larunbatean Azkoitian egindako lana defendatu du, izan ere, "protokoloa bete" omen zuten, nahiz eta sua itzali ondoren berpiztu egin zen.

Aldundiak agiri bat kaleratu du eta bizilagunen kritikei aurre egin nahi izan die. Bizilagunak, 29 inguru, oso haserre zeuden sua itzalia zegoela pentsatuta suhiltzaileek alde egin eta sutea berriro piztu zelako.

Garbiñe Errekondo buru duen departamentuak azaldu duenez, suhiltzaileek "gela guztiak" berrikusi zituzten "kamera termikoekin" sutea itzali zela frogatzeko.

Horren ondoren, berriro berrikusi zuten eraikina Ertzaintzaren laguntzarekin, eta ondoren eman zen sua itzalitzat.

Pello Bastarrika Azkoitiako alkateak ez du suhiltzaileen lana baloratu nahi izan suhiltzaileen, Ertzaintzaren eta udal-teknikarien txostena eskuartean izan arte.

Hala eta guztiz ere, Udalaren "lehentasuna" etxerik gabe geratu direnei aterpea ematea dela. Azpimarratu du.

Pablo Ibarren epaiketa ez da errepikatuko. Horrela erabaki du Floridako epaile batek, eta era honetan, Pablo Ibarren defentsak epaiketa errepikatzeko eskatzen zuen helegitea baztertu du.

Benjamin Waxman Ibarren abokatuak "etsita" daudela esan du. Epaileak hiru aldiz atzeratu du erabakia abokatuaren azalpenak aztertzeko denbora gehiago behar zuela argudiatuz.

Waxmanek beste helegite bat jarriko dutela baieztatu du, oraingoan Floridako Auzitegi Gorenean. 30 egun ditu dena kudeatzeko eta baliteke "bi edo hiru urte" pasatzea erakunde horrek erantzunen bat eman arte.

Ibar Floridako Starke espetxean dago 2000. urteaz geroztik, 1994an AEBetako hegoaldean hiru lagun hiltzea egotzita heriotza-zigorra jarri ziotenetik.

Pablo Ibarren heriotza-zigorraren aurkako elkartea erabakiaz kexatu da

Pablo Ibarren heriotza-zigorraren aurkako elkarteak ohar bat bidali du Jeffrey R. Levenson epaileak hartutako erabakiaren aurka.

Elkarteak esan duenez, epailaren argudioetako bat hauxe izan da: "Manchesterreko Unibertsitateko aurpegi-azterketako aditua ez zegoen nahikoa kalifikatua bideoan azaltzen den aurpegia Ibarrenarekin bat ez zetorrela esateko".

Gainera, Ibarrek defentsa egokia izan zuela ondorioztatu du epaileak. Gogor kritikatu du azken erabaki hori elkarteak; izan ere, aurpegiak identifikatzeko adituen txostenik eskatu ez zuela salatu dute. "Ofiziozko abokatuak bi aldiz etenarazi zuen epaiketa. Lehenengo, gibeleko mina zuelako, eta, bigarrenez, genero indarkeriarekin lotutako jazoera batean sartuta zegoelako", gaineratu dute.

Bestalde, elkarteak gogora ekarri duenez, "hiltzailearen elastikoko DNAk ez du ez Pablo Ibarren ez biktimen DNArekin bat egiten".

Edukiak jaisteko edo 'streaming'-ak ikusteko webguneetara estekak egitea ez da delitua. Hala uste du Arabako Lurralde Auzitegiak eta Cinetube auzia ixteko erabakia hartu du.

Zenbait ekoizlek Cinetube webgunea ixtea eskatu zuten duela hiru urte, zinema estrainaldiak ikustea ahalbidetuta, autoreen eskubideak urratzen zituela argudiatuta. Cinetube pelikulak 'on-line' eta dohainik ikustea ahalbidetzen duen Espainiako webgunerik garrantzitsuenetakoa da.

Arabako Lurralde Auzitegiaren ebazpenaren arabera, Cinetuberen jarduera ez da legearen aurkakoa, "bere webean edukirik biltzen ez duelako eta beste orri batzuetara estekak egiten mugatzen delako".

Era berean, Cinetuberen jarduera Informazio Gizartearen Zerbitzu Legeak babesten duela azpimarratzen du.

Epaia irmoa da eta, ondorioz, ez dute helegiterik onartuko. Prozesu judizialak iraun duen hiru urteotan Cinetube webgunea irekita egon da.

Isabek Celaa Eusko Jaurlaritzako Hezkuntza sailburuak esan duenez, ez dute Ministerioak adostutako gai-zerrendaren kontrako helegiterik aurkeztuko, horrek aurreikusita dagoen Lan Eskaintza Publikoa geldiaraziko lukeela argudiatuta. "Ezin gara proba prestatzen ari diren 10.000 lagunekin jolastu", esan du Celaak.

Radio Euskadin egindako elkarrizketa batean adierazi duenez, gai-zerrendaren aldatu izanaren aurka egin daiteke, eta ez hori bakarrik, "ziur aski irabazi ere bai", baina horrek "Eskaintza Publikoa geldituko luke". Hezkuntza sailburuaren arabera, hori "neurrigabea" litzateke, eta hortaz, LEPa aurreikusi bezala egingo dela esan du.

Espainiako Hezkuntza ministro berriak dekretuz bideratutako aldaketak ez duela "aurrekaririk" esan du Celaak. "Erkidegoei kontsultatu gabe eta oposizio bateko gai-zerrenda adosteko izapideak saihestuz", egin dela azpimarratu du.

Celaaren ustez, horrelako erabaki bat "arduragabekeria da ministro kargua duen pertsona batengan" eta erkidegoetako gobernuekin eta batez ere oposizioa prestatzen ari direnekin "errespetu falta".

Halaber, gai-zerrenda "oso zaharkitua" ezarri dutela salatu du Celaak, eta, adibide gisa, ez direla "bullyinga, ziberkultura, informatika edo Sarean erabiltzen den mintzaira" aipatu ere egiten azaldu du.

Gaixotasun larria duen anaia salbatuko duen haurtxoa jaio da asteburuan Sevillako ospitale batean.

Estrella haurtxoaren zelulak Antonio anaiari transplantatuko dizkiote, izan ere, bizkarrezur muineko aplasia larria du eta bizkarrezur muinean odola ekoizteaz arduratzen diren zelulak desagertzen zaizkio, Andaluziako Osasun Sailak jakitera eman duenez.

Bigarren aldia da anaia edo arreba salbatzeko helburuarekin haurtxo bat jaiotzen dela Sevillan.

Maria Jesus Montero Osasun sailburuak, Guillermo Antiñolo Genetika zuzendariak eta Jose Antonio Perez Hematologia Klinikoko zuzendariak prentsaurrekoa emango dute gaur kasuaren nondik norakoak azaltzeko.

Marta del Castilloren hilketa aztertu duen epaileak Ruta del Agua izeneko inguruan dagoen amildegi bat "begiz arakatzeko" eskatu dio Poliziari. Camasetik (Sevilla) gertu dago amildegia eta biktimaren aitonak manta bat aurkitu zuen bertan.

Efe albiste-agentziak zabaldu duenez, epaileak aitortu du aipatu manta horretan ez zegoela Marta del Castilloren DNA arrastorik, hori dela eta, "ez dago arrazoirik inguru horretan zulaketak egiteko edo lurrak mugitzeko".

Hala ere, "gure esku dauden aukera guztiak agortzeko", epaileak amildegia begiz ikuskatzea agindu dio Poliziari, "bilaketa-lan sakonagoa egitea beharrezkoa ote den jakiteko".

Epailearen arabera, edozein ekintza "bermatuta egongo litzateke alaba aurkitzeko esperantza duten gurasoengatik", baina "ez litzake onargarria izango zentzuzkotik harago joatea, oinarririk gabeko bilaketa lanetarako baliabide publikoak erabiltzea".

Ostiralean Kongresuko inguruetan izandako istiluengatik atxilotutako bederatzi pertsonak aske utzi dituzte, karguekin, igande arratsaldean, 15M mugimenduko bozeramaile baten arabera.

Iturriaren arabera, guztiei desordena publikoa eta agintaritzari jarkitzea leporatu diete. Horietariko bati, gainera, agintaritzaren kontrako atentatua ere egotzi diote.

Informazioko Lurralde Brigadan bi gau pasa ondoren, atxilotuak Castilla plazako epaitegietara eraman dituzte igande goizean, goardiako epailearen aurrean deklaratzera.

Istiluetan Poliziak karga egin zuen manifestari batzuen kontra, Diputatuen Kongresura hurbiltzen saiatzen ari zirenean. Manifestari batek zortzi poliziak zauri arinak izan zituzten.

Larunbatean, Pirinioetako Soum de Léviste mendia igotzen ari zirela, istripua izan zuten 3 mendizale euskaldunek, 2.400 metrora.

Pierrefitte-sur-Seineko goi-mendiko erreskate-taldeak abisua jaso zuen larunbat arratsaldeko 14:00ak aldera. Larrialdi taldeak haiengana iristea lortu zuenean, Soraluzeko 38 urteko gizonezkoa koma egoeran aurkitu zuten.

Biktima, Iñaki Ruiz Arana, oso kirolzalea zen eta mendizalea batik bat, 38 urte zituen eta Soraluzeko eta Otxandioko beste bi lagunekin asteburu pasa joan zen.

Helikopteroz Tarbeko ospitalera eraman zuten, baina medikuek ez zuten suspertzea lortu, eta bertan hil zen mendizalea.

Erreskate taldearen lehen informazioen arabera, hildakoa 200-300 metrotik erori zen izoztutako gune batean. Ikerketak irekita jarraitzen du eta nola eta zergatik erori zen aztertzen ari dira.

Ezbeharra gertatu eta berehala deitu zuten larrialdi zerbitzuetara biktimaren lagunek, baita inguruan zeuden beste mendizale batzuk ere, baina biktimak kolpe asko zituen eta Tarbeko ospitalera zihoala hil zen.

Zortzietakoak kirol elkarteko kide zen Iñaki eta bertako bazkide batek Radio Euskadin kontatu du istripua zorte txarraren eraginez gertatu zela. "Esperientzia eta eskarmentu handia zuen, asko entrenatzen zuen eta inolaz ere, ez zen arduragabe bat", adierazi du.

Soraluzen, hileta egin dute arratsaldean, Iñaki Ruiz Arana, Pirinioetan hil den mendizalea agurtzeko. Gorpua bihar iritsiko da, eta herriko plazan, omenaldia egingo diote.