Aurrekontuen Batzordeko ordezkaria den Antonio Gallego Kataluniako PPko diputatuak "tonto" deitu dio Toni Cantóri horrek Kongresuko jesarlekuak erdi hutsik erakusten dituen bi argazki erakusteagatik. Horrez gain, "antzerti mundura bueltatzeko" aholkatu dio diputatuak.

Astearte honetan, legegintzaldi honen lehenengo ohiko Osoko Bilkuran, Toni Cantók Kongresua erdi hutsik erakusten zituen bi argazki igo ditu TWitter sare sozialera. "Gaur hemizikloa nahiko triste dago..." idatzi du mugikorretik ateratako argazkiak ilustratzeko asmoz.

"Esan didatenez, Toni Cantók hemizikloa erdi hutsik erakusten duen argazki bat publikatu du. Ezin daiteke tontoagoa izan -idatzi du Twitterrean- bueltatu zaitez antzerti mundura" erantzun du Antonio Gallegok.

Non zaude orain?

Bitartean, PPko beste diputatu batzuek UPyD alderdiko diputatuaren jarrera kritikatu dute. "Toni Canto: lezio justuak" idatzi du Carmen Rodriguez Maniega asturiarrak.

PPko diputatu hauek Toni Cantó "bere postuan egoten ez den lehena" dela azaldu dute. "Non zaude orain?" galdetu dio Rodriguez Maniegak, "denok plenoan eta zu ez dakigu non".

Idoia Mendia Eusko Jaurlaritzako bozeramaileak Eusko Legebiltzarrean agerraldia egitea eskatu du, 2000 eta 2009 bitartean Justizia Sailean sinatutako hainbat kontraturen ustezko irregulartasunen salaketaren inguruan azalpenak bertan emateko.

Atzo bertan eman zuen ustezko irregulartasun horien berri Mendiak. Bozeramaileren hitzetan, Jaurlaritzak "irregulartasun larriak" atzeman ditu Justizia Sailak 2000 eta 2009 artean, Joseba Azkarraga sailburu zenean, egindako 15 kontratu informatikotan, eta Fiskaltzari jakinarazi dio. 23 milioi eurora iristen dira irregulartasun horiek, Idoia Mendiaren arabera.

Salaketa hauen aurrean, Joseba Azkarraga orduko sailburuak eskutitz bat bidali zion atzo bertan Mendiari. Kontratu guztiek kontrolak igaro zituztela argitu zuen bertan, eta ''ebazpen judizialik gabe'' horrelako salaketa egin izana ''iraingarri'' jo zuen Azkarragak.

Eusko Alkartasunak ere ustezko irregulartasun horiek oso-osorik ikertzea eskatu zuen atzo bertan, idatzi batean.

1968-1978 urteen artean Estatuaren indarkeriak eragin zituen biktimek 35.000 eurotik 390.000 euro arteko diru-laguntzak jasoko dituzte Jaurlaritzatik, gaur onartu duten dekretuaren arabera.

Euren ekintzetan heriotza edo zauriak izandako ETAko kideak ez ditu biktimatzat hartu Jaurlaritzak. Iturri berdinaren arabera, heriotzagatik Jaurlaritzaren kalte-ordaina 135.000 eurokoa izango da, baliaezintasun handiko kalte-ordaina 390.000 eurokoa, ezintasun iraunkor erabatekoa 95.000koa, ezintasun iraunkor osoa 45.000koa eta ezintasun iraunkor partziala 35.000koa.

Motibazio politikoko biktimei buruzko dekretua da gaur onartu dutena. Manuela Carmena epaileak zuzendutako taldeak egin duen dekretuak 1968-1978 epealdian Estatuaren indarkeriak eragin zituen biktimak hartzen ditu kontuan eta biktima horiek "kalte-ordainak jasotzeko, egia ezagutzeko eta justizia egiteko" duten eskubideak gauzatzea du helburutzat.

Espainiako Konstituzioa onartu zenetik gaur egun arte Estatuaren indarkeriaren ondorioz izan diren biktimak aintzat hartzeko bigarren dekretu bat egiteko asmoa dauka Jaurlaritzak.

"Modu zuzenean nahiz zeharka segurtasun indarrek, funtzionari publikoek edota Administrazio Publikoarekin elkarlanean aritzen ziren beste pertsona batzuek egindako ekintza bidegabeek eragindako sufrimendu injustuak pairatu dituzten pertsonak" joko dituzte Estatuaren biktimatzat.

Balizko biktimen kasuak aztertzeaz arduratuko den batzordea Giza-eskubideen Zuzendaritzak zuzenduko du eta honela egongo da eratuta: aipatu zuzendaritzak aukeratutako bi aditu izango dira; Eusko Legebiltzarrak aukeratutako beste bi ordezkari; Terrorismoaren Biktimei Laguntzeko Zuzendaritzaren beste ordezkari bat; eta euskal gizartea ordezkatuko duen beste pertsona bat.

Rodolfo Ares Herrizaingo sailburuak "elkarrizketa pribatuak manipulatzea" eta "Euskadiren izena alderdiaren mesederako zikintzea" leporatu dio Iñigo Urkullu EAJren presidenteari. Horren harira, izandako harremanetatik ezin omen da "alarmarik" ondorioztatu, "are gutxiago Jaurlaritza kiebran erortzeko arriskuan dagoela pentsatu".

Aresek agiri batean azaldu duenez, buruzagi jeltzaleak "akatsari eusten dio", izan ere, gaur bertan berretsi du Jaurlaritzaren egoera ekonomiari buruz esandakoa. Hori dela eta, sailburu sozialistak azaldu duenez, Urkulluk "bere horretan jarraitzen du elkarrizketa pribatuak manipulatuz Euskadiren izena zikintzen, atzera egin beharrean".

Aresen arabera, Urkullurekin izandako elkarrizketa horiek "Jaurlaritzan dudan arduraren diskrezioarekin gorde beharko lirateke" eta "ez da lehenengo aldia" EAJren presidenteak "elkarrizketa pribatuak jakinarazten dituela asmo txarrarekin, egiarekiko errespeturik gabe".

Horren harira, urtarrilaren 23tik aurrera izan dituzten elkarrizketetatik "alarma zeinurik" ezin dela ondorioztatu azpimarratu du.

Azaldu duenez, dei horiek ezin dira "etsipenezko dei" bezala ulertu, ezta "Jaurlaritzaren kiebra baten atariko direla pentsatu ere".

Aresek gogorarazi du Joseba Egibar EAJren Gipuzkoako buruak berak gezurtatu duela Urkulluren bertsioa.

Andoaingo PSEko ordezkariek Joseba Pagazaurtundua omendu dute gaur goizean (ETAk orain bederatzi urte hil zuen). Ekitaldian Maite Pagazaurtuak herritarrei "kontuz ibiltzeko" eskatu die, "ETAren estrategiaren morroi" bihurtu ez daitezen.

"Kontzientzietan jendeak beldurra du oraindik, eta guk herritarrei libre izateko eskatzen diegu ETAren estrategiaren aurrean, bai libre sentitzen direnei eta baita libre sentitzen ez direnei ere: gauzak diren bezala ikusten saiatzeko eskatzen diegu, eta bidean topatzen ditugun trikimailuetan ez jauzteko", esan du.

Pagazaurtunduarekin batera, Andoaingo Udaltzaina izan zenaren alarguna eta PSEko hainbat ordezkari izan dira omenaldian. Joseba Pagazaurtunduaren omenez egindako eskulturaren aurrean egin dute, Andoainen.

'Pagaza'ren arrebak esan du, "Euskadiko eta Nafarroako gizartearentzat aro berri bat ireki nahi bada", beharrezkoa izango dela "ETAk kaputxak kentzea". "Desegin behar dira", azpimarratu du.

Gogoratu duenez, ETAren hilketen % 40 "ez dira oraindik argitu" eta biktimek "egia" behar dute.

Larunbat honetan, eguerdiko 12:00etan, Andoaingo plazan, Josebaren familiak ekitaldi berezi bat egingo du. Horren harira, Estanis Amutxategi Andoaingo alkate ohiak biktimak ez ahazteko eskatu die herritarrei.

Jose Antonio Pastor PSE-EEko bozeramailea ETBko "Egun On Euskadi" saioan egon da Euskadiko egoera politikoaren analisia egiteko.

Iñigo Urkullu "soilik bere alderdiarekiko da abertzalea, ez herrialdearekiko", adierazi du Pastorrek eta Euskadi, finantza-merkatuen aurrean "arriskuan" jartzea egotzi dio.

"Hanka sartu zuela onartzeko" eskatu dio Urkulluri kazetariek Eusko Jaurlaritza porrot egitekotan al zegoen galdetuta baietz erantzuteagatik.

Bozeramaile sozialistak "alarma arduragabea" sortzea leporatu dio eta egun batzuk beranduago, gainera, "egiak erdizka esanez zulo horretan sakontzea" aurpegiratu dio.

"Urkulluk ez du ez euskaldun hitzik, ezta une zail batekin leialtasunik ere", esan du Pastorrek.

Zergak jasotzen dituzten erakundeak aldundiak direla gogoratu du bozeramaile sozialistak eta "diru-sarreren aurreikuspenak ez dituzte bete", adierazi du. Iruzur fiskalaren aurka egiteko denen arteko plana eskatu du, baita ogasun publikoaren diru-sarrerak handitzeko zerga-erreforma bat egiteko ere.

Atzo Eusko Jaurlaritzak 2000 eta 2009 artean sinatutako kontratu informatikoetan irregulartasunak atzeman zituela iragarri zuen, baina horrek EAJrekin duten polemikarekin ez duela zerikusirik gaineratu du.

Mariano Rajoy Espainiako Gobernuko presidenteak aitortu du langabeziaren egoera "kritikoa" dela, eta aurten txarrera egingo duela. Hori dela eta, lan erreforma "zabala, sakona eta orekatua" izango dela aurreratu du.

"Legegintzaldiaren abiapuntua ezin izan zen txarragoa izan", nabarmendu du Rajoyk, Kongresuan egindako agerraldian.

Nolanahi ere, Gobernuaren zeregina "egoerari buelta ematea" dela esan du, eta beraz, hainbat erreforma egingo dituztela iragarri du.

"Premiazkoena defizit publikoa murriztea da", ohartarazi du, eta lehen murrizketekin "sinesgarritasun krisiari" konponbidea eman nahi izan diotela erantsi du.

Horren harian, 2020 urterako defizita zeroan uztea PSOE oraindik Gobernuan zegoenean sinatu zuten akordio konstituzionalean aurreikusi zutela esan du Rajoyk, eta horrela zehazten duela Europako araudiak.

Aurrekontuen egonkortasunerako legearen aurreproiektuari kritika egin dio PSOEk; izan ere, 2020rako defizita % 0,4an adostu zela esan du, ez % 0an.

Jada atzo iragarri zuen PSOEk ez duela lege hori babestuko, aurreko Gobernuaren eta PPren arteko akordioa hausten duela iritzita.

Rajoyk, ordea, bere Gobernuaren plan ekonomikoak "galdutako denbora berreskuratzea" duela helburu adierazi du, "Europar Batasunarekin herrialdeak harturiko konpromisoak betetzeko", eta hori ez betetzeak "merkatuen presioa" eragiten duela uste du.

Bestalde, PSOEko buruzagiak, Alfredo Perez Rubalcabak, 2012. urteko aurrekontuak Kongresura "lehenbailehen" eramateko eskatu dio Mariano Rajoyri. Merkatuen "konfiantza" berreskuratzeko ezinbestekoa dela adierazi du, eta Andaluziako hauteskundeak pasatu arte ez itxaroteko exijitu dio.

Europako Batzordean hitz egindakoa azaltzeko gaur egiten ari diren kontrol-saioan, PPren politika ekonomikoa azaltzeko erabiltzen ari dela egotzi dio Rubalcabak sozialisten idazkari orokor bezala Rajorekin izan duen lehen "aurrez aurreko" eztabaidan.

Horregatik, "Jainkoak dioen bezala" eta denboraren mugarik gabe, politika ekonomikoaren inguruko beste eztabaida monografiko bat eskatu dio datorren asterako Rubalcabak.

Joan den urtarrilaren 30an Europar Batasuneko herrialdeek goi-bileran sinatu zuen akordio fiskala "zerga-doikuntzara" mugatzen dela eta hazkundea alde batera uzten dela esan du Rubalcabak.

Josu Erkoreka EAJko bozeramaileak, BPGaren % 8ko defizit publikoa % 4,4ra urtebetean jaistea ezinezkoa dela esan du eta doikuntzaren politika modulatzeko Europar Batasunaren "pepito kilkerra" bilakatzeko eskatu dio Rajoyri.

Egonkortasunerako akordioan malgutasuna negoziatzeko eskatu dio Erkorekak, bestela, atzeraldian sakondu gabe defizit publikoa erdira jasitea "ezinezkoa" dela esan dio.

Eurobonuak martxan jartzeko eta Europako Banku Zentralak ekonomia suspertzeko paper aktibo bat bere gain hartzeko Europar Batasunean lehenbailehen kanpaina bat hasteko ere exijitu dio.

Rafael Larreina, Amaiurretik, hazkundearen alde ez egitea egotzi dio Gobernuari. "Estatuak zerbitzuen sektorean eta adreiluaren krisian murgilduta jarraitzen du", esan du. Larreinaren iritziz, ekonomia produktiboaren alde apustu egin behar da.

Josep Antoni Duran Lleida CIUko bozeramaileak Europar Batasunak bere kideei ezarritako defizit zorrotzagoa ezin zaiela erkidegoei ezarri ohartarazi dio Gobernuari.

Azkenik, Bruselak exijitzen duen defizitaren helburu "irreala" mantentzea "suizida" dela esan Rosa Diez UPyDko bozeramaileak. Europar Batasunean Felipe Gonzalezek eta Jose Maria Aznarrek egiten zuten modura borrokatzeko eskatu dio.

Iñigo Urkullu EAJren presidenteak jakinarazi du Rodolfo Ares Herrizaingo sailburu eta Eusko Jaurlaritzaren koordinatzailea izan zela iragan astean "etsita" deitu ziona, dirurik ez zutelako laguntza eske.

EAJren presidenteak Jaurlaritzari erantzun dio ez duela "atzera egingo" eta diru-kontuen "benetako egoera" argitzeko eskatu dio, izan ere, "oraindik ez dute azalpenik eman".

Radio Euskadin egin dioten elkarrizketa batean azaldu duenez, Carlos Aguirrek atzo agerraldia egin bazuen ere, oraindik ez dute azaldu zein den Jaurlaritzaren egoera ekonomikoa.

Bestalde, Urkulluk argi adierazi nahi izan du ez zuela "kiebra" hitza erabili Jaurlaritzaren egoera ekonomikoaz hitz egin zuenean. Horren harira, Carlos Aguirreren agerraldia kritikatu du, izan ere, "zenbat diru duten esan zuen, baina ez zuen 2011ko defizit publikoaren benetako datua esan".

"Eusko Jaurlaritzaren diru-kontuak onak baldin badira, zergatik jotzen dute EAJrengana laguntza eske?", galdetu du buruzagi jeltzaleak.

Urkulluk aitortu du "atsekabetuta" dagoela bere hitzak "desitxuratu" zituztelako Jaurlaritzaren "gabeziak estaltzeko". Hala ere, "kezkatuta" agertu da Gasteizko Gobernuaren egoera ekonomikoarekin.

Mariano Rajoy Espainiako Gobernuko presidentea lehen aldiz izango da gaur Kongresuan azalpenak ematen, kargura iritsi zenetik. Saioan, gainera, Alfredo Perez Rubalcaba ere arituko da estreinekoz, PSOEko idazkari nagusi denetik.

Saioa 09:00etan hasiko da, eta lehenik eta behin Rajoyk azalpenak eman beharko ditu Europako Batzordearen azken bilerari buruz.

Hain zuzen ere, goi-bileran hartutako erabakiei buruzko zehaztasunak eman beharko ditu, hala nola enplegua sortzeko planak.

Baliteke defizita murrizteko egutegia ere hizpide hartzea.

Eztabaida horren ostean, Gobernuaren kontrolerako saioa hasiko da.

Joseba Azkarraga Eusko Jaurlaritzako Justizia sailburu ohiak bere Sailak egindako kontratu guztiek Administrazioaren kontrol guztiak igaro zituztela defendatu du.

Idoia Mendiak egindako salaketaren ondoren, Azkarragak eskutitz bat bidali dio Jaurlaritzako bozeramaileari.

Sailburu ohiak  argi utzi dio salaketak erabat ikertu daitezen eta ahalik eta arinen argitu daitezen exijitzen lehena bera dela, ''egindako lanaren inguruan inolako zalantzarik gera ez dadin''.

"Esan beharrik ere ez dago sailburu bezala Jaurlaritzan aritu nintzen garaian egin ziren kontratu guztiek izaera publikoa izan zutela, eta Administrazio Publikoek kontrolei erabat lotuta egon zirela'', esan dio Azkarragak Mendiari, eskutitz horretan.

Hori dela-eta, sailburu ohiak ''iraingarri'' jo du ''ebazpen judizialik gabe'' horrelako salaketa egin izana.