Gidarientzako azken berrikuntza Tecnalia euskal enpresaren eskutik iritsi da; hain zuzen ere, horri esker gidariek ez diote aurrerantzean zertan bolanteari heldu. Sakelako telefonoa erabili, egunkaria irakurri, jan... Denetarik egiteko aukera izango da, inolako kezkarik gabe.

Autoan horrelakoak egiten dituztenek ez dute isunik jasoko, autoa ez baitu gidariaren tokian doanak gidatuko; pilotuaren lekuan eserita joango da, bai, baina ez du izango bolantea zertan ukitu.

Mirariaren arduraduna ‘Platooning' gidatze birtuala ekarriko duen programa da. Berari esker, posiblea izango da, adibidez, hiru auto kamioi baten atzean ilaran jarri, honi 'lotu' eta gidatze birtuala martxan jartzea.

Programari esker, kontsumoa % 20 murriztuko da, batez ere ibilgailuek airearen aurkako erresistentzia txikiagoa egiten baitute elkarren atzean joanda. Garraio iraunkorra ere bultzatzen du, eta kamioien eta autoen gidarien atsedena erraztu.

Bi-hiru urtean, martxan

Hala ere, sistema horrek eragozpenak ere baditu; izan ere, autoek 'lotutako' ibilgailuaren abiadura berean joan behar dute.

'Platooning' programa Sartre Europako proiektuari dagokio, eta Tecnaliak proiektu horretan duen egitekoa izakiaren eta makinaren arteko harremana garatzea da; hau da, gidariarekin zerikusi zuzena duen sisteman sakontzea. Proiektuak bi urte daramatza indarrean eta interes handia piztu du. Teknologia berria bi-hiru urteko epean martxan izango dela aurreikusten dute.

Roy Bostock Yahoo! Inc-en presidenteak eta konpainiako beste hiru zuzendarik dimisioa eman dute konpainiako barne eztabaida dela eta. Besteak beste, Alibaba Groupen eta Yahoo! Japanen enpresak izan beharko lukeen parte-hartzearen inguruan sortu dira desadostasunak.

Webgune handienetako bat izan den arren, orain porrot egiteko zorian dago eta negozio berriak bilatzeko prozesuan dago murgilduta hazi ahal izateko. Hori dela eta, atzo Alfred Amoroso Rovi Corpen kontseilari ordezkari ohia eta Maynard Webb eBayren eragiketa zuzendari ohia kontseilari independente izendatu dituzte.

Inbertsoreek gogor kritikatu izan dute Yahoo!ren Zuzendaritza batzordea konpainian aldaketak egiteko gai izan ez delakoan.

Bostock 2003an sartu zen Yahoo!ren zuzendaritza batzordean, eta konpainiako akziodunen kritiken jomugan egon da beti. Bostocki eta Jerry Yang Yahoo!ren fundatzaileari leporatu zieten Microsoftek 2008an konpainia erosteko egindako eskaintza errefusatu izana.

Roy Bostockek bere postuan jarraituko du beste bi hilabetez, konpainiaren urteko batzarra arte.

Euskadiko eta Nafarroako enpresa talde batek euskal teknologiarekin egindako lehen motozikleta elektrikoa diseinatu du. Motorra gaurtik dago salgai Donostiako kontzesionario batean.

Gipuzkoako Luma enpresako marketin zuzendari Iñaki Santillanak eta proiektuko burua den Manuel Alkorak parte hartu dute aurkezpenean. Sustatzaileek adierazi duten legez, bateriak dira Euskadin fabrikatu ez diren pieza bakarrak. Izan ere, material hauek ez dira Espainian aurkitzen.

Motorrak 4.216 euroko prezioa du Industria Ministerioaren Movele Planak eskaintzen duen %25eko dirulaguntzarekin. Scooterra aurten banatuko da Iruña, Bartzelona, Madril eta Zaragozako kontzesionarioetan, besteak beste, eta 2013an Frantzia eta Italia bezalako herrialdeetara esportatzen hasiko direla aurreikusi dute sustatzaileek. Izan ere, datozen bi urteetan 1.100 moto banatuko direla aurreratu dute.

Honako enpresa hauek parte hartu dute motorraren garapenean: Inmotec (Nafarroa), Dhemen Desing (Gipuzkoa) eta Robotiker. Era berean, Industria Ministerioaren, Gipuzkoako Foru Aldundiaren eta Eusko Jaurlaritzaren laguntza izan dute, SPRIren bitartez.

"LEMev Stream" ibilgailu elektrikoa 125 zentimetro kuboko motozikleta baten parekoa da. Batez ere, egunean 20 eta 50 kilometro bitartean egiten dituzten eta kontzientzia ekologikoa daukaten erabiltzaileei zuzenduta dago.

Telekomunikazioen Merkatuko Batzordeak bederatzi hilabete aurreratu du telefonia mugikorreko maioristen prezio jaitsiera, 2012ko apirilaren eta 2014ko urtarrilaren artean modu progresiboan aplikatuko dena.

Prezio objektiboa minutuko 1,09 euro-zentimotan geratuko da; beraz, sare propioa duten hiru operadore nagusien (Movistar, Vodafone eta Orange) prezio maioristak % 75 inguru merkatuko dira, eta Yoigorenak, ia % 80.

Neurri horrekin, Telekomunikazioen Merkatuko Batzordeak merkatuko lehia handitu nahi du, eta telekomunikazio zerbitzuen prezioak txikitu, herritar zein enpresentzat, gure ekonomiaren lehiakortasuna handitze aldera.

Apple konpainiak iragan ostiralean baieztatu zuenez 3G teknologia duten iPhone eta iPad produktuak saltzen hasteko baimena du Alemaniako online dendan. Behin behineko neurri gisa, bertan behera geratu ziren produktu horien salmentak Motorola Mobility Holdingsek aurkeztutako salaketa baten harira, abenduan.

"IPaden eta iPhoneren modelo guztiak saltzen hasiko gara berriro berehala Alemaniako online dendan", adierazi zuen Alan Hely Appleren bozeramaileak, behin behineko debekua bertan behera geratu zela jakinarazi ondoren.

Helyk ez zuen argitu salmente zehazki noiz hasiko zen, baina "berehala" izango omen da.

Mannheimeko epaitegi batek debekatu egin zion Appleri 3G teknologiadun produktuak saltzea Alemanian, Motorolaren sakelako telefonoen patenteren bat urratu zuelakoan.

SharesPost Inc. baloreen merkatu bitartekari pribatuak 94.000 milioi dolarretan baloratu ditu Facebookeko akzioak. Horrela, 40 euroko balioa eman dio akzio bakoitzari.

Mark Zuckenbergeko enpresak Burtsan sartu ostean har ditzakeen balioa ezagutzeko orientazio bezala har daitezke datu hauek. Izan ere, azken informazioen arabera, litekeena da datorren maiatzean Facebook Burtsan sartzea.

Mauka ikusita, baten bat egoeraz aprobetxatzen saiatu da. Izan ere, Facebookeko akzio faltsuak saltzeagatik AEBetako emakumezko bat atxilotu dute.

Teknologia berriek eta sare sozialek informazioaren eta komunikazioaren kontsumoa aldatu dute. 850.000 pertsona konektatzen dira Internetera egunero Euskadin, eta erdiak baino gehiagok sare sozialetara. Are gehiago, Internet da euskal herritarrek prestakuntza lortzeko gehien atsegin duten baliabidea, eta telebistak soilik gainditzen du informazioa eta entretenimendua bilatzeari dagokionez.

Horiek dira Lehendakaritzaren Prospekzio Soziologikoen Kabineteak komunikabideen kontsumoari buruz egin duen azterketan jasotako datuetako batzuk.

Komunikabide publikoak, kalitatearen erreferente Euskadin

Ikerketa horren arabera, telebista da informaziorako eta entretenimendurako baliabide erabiliena, eta Euskadiko biztanleen % 83ak egunero ikusten du.

Ikerketako datuetan jasotzen denez, Euskadiko biztanleentzat TVEko lehen kateak du kalitate handiena, eta ondoren ETB-2k, Cuatrok eta Sextak. Informatiboen arloan, ETB-2ko albistegiak dituzte gogokoen, Television Españolako albistegien atzetik.

Irratiei dagokienez, EITB taldekoak dira entzunenak egunero.

Facebook sare sozialak burtsara ateratzeko salmenta eskaintza publikoa egin du eta, helburua, 5.000 milioi dolar eskuratzea da.

AEBetako Baloreen Merkatuko Batzordeari aurkeztutako dokumentuen arabera, sare sozialak "FB" sinboloarekin kotizatu nahi du eta Morgan Stanley bankuarekin iritsiko da Wall Streetera.

JPMorgan Chase, Goldman Sachs, Bank of America, Barclays eta Allen & Co erakundeek sare sozialaren burtsara irteeran parte hartu lezakete. Facebookek aurkeztutako dokumentazio horren arabera, sare sozialak egunean 845 milioi erabiltzaile ditu.

Facebookek aurtengo bigarren hiruhilekoan kotizatzen hasi nahi du, baina oraindik ez dute zehaztu New Yorkeko (NYSE) burtsan edo munduk teknologia enpresa handienak dauden Nasdaq merkatuan arituko diren.

Merkatura aterako dituzten akzio kopurua eta prezioa ere ez dute iragarri, baina 2011ko emaitza ekonomikoei buruzko informazioa zabaldu dute. Horrela, iaz 3.700 milioi dolarreko diru-sarrera eta 1.000 milioiko irabazi garbi izan zituela esan du sare sozialak.

Orange eta Dr. Carlos Elosegui Fundazioek komunikatzeko oztopoak dituztenei zuzendutako e-Mintza izeneko aplikazio berri bat kaleratu dute. Ukimenaren bidezko multimedia teknologiari esker, erreminta horrek erabiltzailea beste pertsonea batzuekin komunikatzea ahalbidetzen du, pertsona horren autonomia sustatuz.

e-Mintza proiektua 2009an sortu zen, eta erabiltzaileen benetazko beharrizanei erantzuteko asmoz, hasieratik etorkizunean proiektua erabiliko zutenen laguntza jaso zuten. Erabiltzaileei eginiko azterketaren ostean, agenda izan liteke berritasunik garrantzitsuena. Agenda horri esker, erabiltzaileak egunean zehar 6 aktibitate programatzeko aukera izango du.

e-Mintzak pertsonalizatzeko aukera zabala eskaintzen du, bakoitzaren beharren edota interesen arabera hizkuntza, ezaugarriak, textuak, bideoak eta soinuak aldatzeko aukera baitauka.

14.000 deskarga baino gehiago

Windows sistemarako kaleratu zutenetik, 2011ko irailetik,, aplikazioak (doakoa) 14.000 deskarga baino gehiago izan ditu jada 40 herrialdetan. Orain, gainera, merkatuan dauden tabletetan ohikoena den sistema eragilerako bertsioan ere eskura daiteke.

Hasiera batean autismoa pairatzen dutenentzat zuzendutako proiektuak beste hainbat erabiltzaile izan ditzake, norbanakoaren beharretara pertsonalizatzeko aukera zabala eskaintzen duelako.

Nobedade iraultzailea iritsi da sare sozialetara. Pinterest aplikazio berriak hankaz gora jarri su Sarea eta, dagoeneko, Facebooken y Twitterren erabiltzeko itxaron zerrenda dago. Paul Sciarra, Evan Sharp eta Ben Sibermann sortzaileek Pinterestek izango zuen eragina ondo neurtu dute eta jendea aplikazioa eskuratzeko irrikatan dago. Horretarako, beharrezkoa da gonbidapena jasotzea edo itxaron zerrendan izen ematea.

Pinterestek iragarkien ohol baten antza du eta, bertan, erabiltzaileak irudiak eta bideoak argitaratu ditzake. Aplikazioak Interesa duten pins-ak (txintxetak) biltzen ditu eta hortik datorkio izena.

Pinterestek eskaintzen duen gauzarik onena, aurkezpena ezezik, zabaltzeko gaitasuna da. Erabiltzaileak eduki bat gustuko badu, repineatzeko (Twitterren retuiteatzea bezala) botoia sakatu ahalko du, El País egunkariak argitaratu duenez.

Pinterest 2010eko martxoan sortu zen, baina joan den abuzutan iPhone gailurako kaleratu zuten bertsioarekin lortu du arrakasta. Ordutik, geroz eta gehiago erabiltzaile gehiago ditu. Alexa webguneak adierazi duenez, Pinterest AEBetako atari bisitatuenen zerrendako 26. postuan dago eta munduko zerrendako 126.ean. Joan den abenduan, 11 milioi erabiltzaile lortu zituen eta, urte bakar batean, 40.000 erabiltzaile izatetik hiru milioi izatera iritsi da. Techcrunch atariaren arabera, erabiltzaileen % 59 25 eta 44 urte bitarteko emakumeak dira.