Whitney Houston abeslaria sendagaiak eta alkohola nahasteagatik hil zen, eta ez itota, prentsa arrosa jorratzen duen TMZ AEBetako webguneak kaleratu duenez. Depresioaren aurkako Xanax sendagaiaren hainbat pastilla hartu omen zituen Houstonek.

Iturri horrek berak jakitera eman duenez, Los Angeles hiriko Beverly Hilton hoteleko gela batean aurkitu zuten Whitney Houstonen hilotza, bainugelako bainuontzian. Mary Jones abeslariaren izebak aurkitu zuen.

Bart egin duten Grammy sarien banaketa ekitaldia dela-eta antolatutako festa batera joateko asmoa omen zuen Whitney Houstonek.

Dena den, hilabete eta erdi edo bi hilabete barru jakingo da ofizialki heriotzaren arrazoia.

Mendekotasunei aurre egiteko, joan den urtean abeslariak laguntza jaso zuela baieztatu du familiak.

Anai-Arrebak taldea une honetan euskal musikagintzan den talde berezi eta interesgarrienetako bat daukagu eta astearte gauean, ETB-3n estreinatuko dugu taldearen bideoklip berria, "Maite zaitut, ez!".

22:30etik aurrera, "Gazteaklip" saioan izango dugu ikusgai Anai-Arrebak taldearen bideoa eta, asteazken goizean, berriz, webgune honetan bertan zintzilikatuko dugu.

Jarrai iezaziozu arrastoa Anai-Arrebak taldeari!

Carlos de Beistegui arte bildumagile izugarri aberatsak “mendeko festa” antolatu zuen 1951n. Mozorro dantzaldia izan zen, eta garaiko pertsonarik ezagunenak gogotsu joan ziren Beisteguik Venezian zuen Palazzo Labia jauregira.

Inauteriak direla eta, Getariako Balenciaga Museoak XX. mendeko ekitaldi ezagunenetako hori errepikatuko du larunbat honetan. Museoak erakusketa aretoak zabalduko ditu eta gerturatzen dutenek bertan afaltzeko aukera izango dute. Bestalde, DJ Makala arituko da giroa berotzen gau osoan zehar. Sarrerak dagoeneko salgai daude Ticketmaster webgunean 50 euroren truke (afaria barne).

Bigarren Mundu Gerraren osteko nazioarteko pertsona ospetsuenak izan ziren Beisteguiren dantzaldian: Orson Welles zinegilea, Barbara Hutton, Jacqueline de Ribes moda diseinatzailea, Diana Cooper aktorea, Natalia Paley printzesa...

Mozorroak Parisko goi mailako jostunek diseinatu zituzten, tartean Cristobal Balenciaga getariarrak.

“Blur taldearen beste album bat izango da”. Adierazpen hori egin du Gaham Coxonek, Blur taldeko gitarra-jotzaileak, The Daily Records egunkarian. Bakarkako azken diskoa ari da aurkezten Coxon (A+E) eta promozio elkarrizketa batean egin ditu adierazpenak.

Brit sarien banaketa festan joko du Blur taldeak, izan ere, “musikari egin dioten ekarpen handiarengatik” sarituko dute. Oraindik entseatzen hasi ez diren arren, laster grabazio estudioan sartuko dira.

Bestalde, zurrumurruen arabera, Blur William Orbit ekoizlearekin aritu da estudioan lanean. Dena den, bietako inork ez du baieztatu.

Britpop taldeak argitaratu zuen azken lana “Fool’s Day” singlea izan zen, 2010ean. 2003az geroztik lau taldekideek batera grabatu zuten lehen aldia izan zen.

Aste honetan ere Gazteako erabiltzaileen proposamenak behar ditugu. “Denboraren makina” atalean bideoklip zaharrak berreskuratzen ditugu; zein izango da oraingo honetan?

Robbie Williams, Joe Cocker, Kauta, Pink Floyd... Artista asko izan ditugu dagoeneko “Denboraren makina”-n, bai euskaldunak, bai atzerrikoak.

Egin ezazu zure proposamena! Utzi iruzkina albiste honetan edo Facebooken dugun orrian.

Adele izan da erregina Grammyak banatzeko 54. ekitaldian. Ezustekorik gabe nagusitu da 23 urteko artista britainiarra, sei garaikur eskuratuta. Los Angelesen egindako sari-banaketa hunkigarria izan zen, larunbatean zendutako Whitney Houston kantaria gogoan izan eta goraipatu baitzuten.

Adelek aurreikuspen guztiak bete ditu eta izendatuta zegoen maila guztietan lortu du saria. "Rolling in the deep" 2011ko Kantu Onena izendatu dute eta haren hitzei dagokien saria, Hitz Onenari ematen zaiona, ere harentzat izan da. Kantari ingelesaren bigarren diskoa, '21' izenekoa, gainera, Diskorik Onena izan da.

Gainera, urrezko mikrofono gehiago ere jaso zituen Adelek: Pop mailako Bakarkako Emanaldi Onena, Pop mailako Disko Bokal Onena eta Musika Bideo Labur Onena. Taula gainera igo zen sei aldietan hitz gutxi egin zuen Adelek, baina, erdi-malkotan, ama, lagunak eta duela bost hilabete ahots-kordatako ebakuntza egin zioten medikuak izan zituen gogoan.

"Disko honen funtsean harreman dohakabe bat dago eta, aurten, bizitza aldatu zait", adierazi du Adelek. Ahotsarekin izandako arazoek zaildu egin dute azken aldian kantariaren ibilbidea eta atzokoa gau berezia izan zen harentzat, ebakuntzaren osteko lehen emanaldia eskaini zuen Grammyak banatzeko ekitaldian. Staples Center ezagunean bildutakoak zutik jarri zituen "Rolling in the deep" abestuta.

Grammyek berretsi egin zuten Adelen pisua musikaren munduan eta, neurri berean, 80ko eta 90eko hamarkadetako emakume ahots indartsu bat agurtzeko ere baliatu zuten ekitaldia. Larunbatean hilik aurkitu zuten 48 urteko Whitney Houston gogoan izan zuten etengabe. Aurkezle lanak egin zituen LL Cool J raperoak otoitz bat eskatu zuen lehenik eta, ondoren, Houston "I will alway love you" kantu arrakastatsua abesten erakusten zuen bideo bati paso eman zion gero. Ondoren, kantu bera moldatu zuen zuzenean Jennifer Hudson kantariak eta hori izan zen unerik hunkigarriena.

Gainontzeko irabazleei dagokienez, Foo Fighters talde estatubatuarra nagusitu zen Rock kategorian (bost sari irabazi zituen), Kanye West Rapean (lau garaikur eskuratu bazituen ere, ez zen sari-banaketa ekitaldian izan) eta DJ Skrillex, berriz, Dance musikaren mailan.

Bi sari irabazi zituzten Taylor Swift, Bon Iver, Cee Lo Green, The Civil Wars, Tony Bennet eta Chick Corea kantariek. Bestalde, Mana nagusitu da Pop eta Rock Latinoaren mailan. Tonny Bennett beteranoak bere ibilbideko 17. Urrezko Mikrofonoa irabazi zuen iaz hildako Amy Winehousekin batera grabatutako kantari esker.

Zuzeneko emanaldietan Nicki Minaj kantariak izan zuen unerik nabarmenena, exorzismo baten plantak egin baitzituen bere saioan. Bestalde, The Beach Boys talde estatubatuar mitikoaren itzulera nabarmentzekoa izan zen, baita Paul McCartneyk, Bruce Springsteenek eta Foo Fighters taldeko lider Dave Ghrolek sari-banaketa amaitzeko egindako gitarra-inprobisazioa ere.

54. Grammy sarien banaketa ekitaldia gaur, otsailaren 12an, izango da Los Angeleseko Staples Center pabilioian, eta sari-banaketan Kanye West, Adele, Bruno Mars eta Foo Fighters taldea dira nagusi, izan ere, lehenengoak zazpi izendapen ditu, eta beste hirurek seina.

Izendapen hauetan, Kanye West da faborito rap kategorian, eta Urteko Hitz Onenen atalean izendatu dute. Bestalde, Urteko Disko Onenaren eta Urteko Kantu Onenaren kategorian sartu dira Bruno Mars eta Adele.

Bestalde, Rihannak eta Radioheadek lau izendapen dituzte, eta Coldplayk, Taylor Swiftek eta Eminemek hiru. Lady Gagak ere hiru izendapen ditu, eta Kantu Onenaren saritik kanpo geratu den arren, Disko Onenaren saria lor dezake Born this way lanari esker. Beyoncek eta Foster the people taldeak, berriz, bi izendapen ditu.

Musika latinoari dagokionez, Pop, Rock eta Urban Diskorik Onenaren kategorian daude izendatuta Calle 13, Maná eta Gustavo Galindo.

Sariak banatzeaz gain, hainbat artistek zuzeneko emanaldiak eskainiko dituzte: Adele, Maroon 5, Chris Brown, Foo Fighters, David Guetta, Coldplay, Rihanna, Alicia Keys, Bruno Mars, Nicki Minaj, Katy Perry eta Taylor Swift, besteak beste.

Whitney Houston abeslaria larunbat honetan hil da, 48 urte zituela, CNN AEBetako telebista kateak zabaldu duenez. Informazioa artistaren managerrak baieztatu du, heriotzaren nondik norakoak argitu ez baditu ere.

80 eta 90ko hamarkadetako poparen erregina Beverly Hilton hotelean zegoen Grammy sari banaketan parte hartzeko asmoa baitzuen. Beverly Hillseko Poliziak baieztatu zuenez, Larrialdi Zerbitzuek hotelaren abisua jaso zuten eta bertara hurbildu ziren.

Hoteleko laugarren solairuko logela batean, 15:30ean (00:30ean hemengo orduan) Houstonen hilotza aurkitu zuten. Hogei minutu eman zituzten hura indarberritu nahian baina ez zuten lortu. Dirudienez, gorpuak ez zituen indarkeria zantzuak baina heriotzaren nondik norakoak oraindik argitzeke daude.

"Harekin zeuden lagunek eta senitartekoek abeslaria bera zela egiaztatu dute eta familia jakinaren gainean daude dagoeneko", azaldu die kazetariei Mark Rosen tenienteak.

Auzitegiko medikuek autopsia egin ostean, handik egun bat ala bi egunetara zabalduko dituzte ondorioak baina Houstonen odolean drogaren edo alkoholaren arrastoak aurkitzen baldin badituzte, litekeena da emaitzak ezagutzeko 6-8 aste itxaron behar izatea.

Doluminak musika munduan

Abeslariari omenaldiak nonahi zabaldu dira. Interneteko sare sozialetan eta baita eszenatokietan ere tristura da nagusi. Mississippin abesten zegoela, heriotzaren berri izan du Bobby Brown Houstonen senar ohiak. Brown negar egiten hasi da, 'Whitney, I love you!" oihukatu du eta zerura musuak bota ditu.

Arrakastaz beteriko abeslaria

Houstonek 170 milioi disko baino gehiago saldu zituen eta azken abestia aurten kaleratzea aurreikusita zegoen. 'Sparkle' izenburua zuen eta 1976. urtean ateratako abestiaren bertsio berri bat izateko asmoa zuten. Houstonek drogarekiko eta alkoholarekiko urte askotako menpekotasuna zuen eta 2011an zaletasun horiek gainditzeko laguntza eskatu zuen.

Houstonek gospel, pop, R&B musika estiloak abestu zituen eta beste alor ere jorratu zituen tartean, aktore, musikagile, ekoizle, enpresari eta modeloa.

Houston 'The Voice' izengoitiarekin zen ezaguna eta ospe handia lortu zuen, 1985ean bereziki, izen berdina zuen diskoaren 30 milioi kopia saldu zituenean. Historian inoiz emakumezko batek lortutako arrakasta handiena suposatu zuen.

Hortik bi urteetara bigarren disko bat atera eta beste marka bat hautsi zuen: disko horrek Bilboard 200 zerrendako lehen postua eskuratu zuen eta horren ondorioz, hura lortzen duen lehen emakume bihurtu zen. Halaber, salduenen artean lehen postuan aste gehiago eman dituen diskoak Houstonenak izan dira, 'Whitney', 'Waiting to Exhale' eta 'The Bodyguard', hain zuzen ere.

Guztira, abeslari estatubatuarrak zazpi disko, filme hiru soinu-banda eta 53 single kaleratu zituen. 'I always love you' emakume baten singlerik salduena izan zen. Sei Grammy sariak, bi Emmy, 30 Bilboard Music Awards eta 22 American Music Awards golardo irabazi zituen.

Zinema munduan ere aritu zen eta bi filmeetan parte hartu zuen: 'The Bodyguard' 1992ean eta 'The Preacher´s Wife' 1995ean.

Lehen postuan dugu Michel Telo aste honetan ere, ''Ai se eu te pego'' kantuarekin, eta laugarren aldiz jarraian dago Top Gaztea zerrendaren gorenean. Jendeak oso gustuko du doinu dantzagarri hau, eta horren erakusgarri da brasildarraren abestiaren arrakasta. Baina, ez da gure artean arrakasta duen bakarra, izan ere, Esne Beltza eta Adele bigarren eta hirugarren postuan daude, aurreko astean bezala mantenduz.

David Guetta eta Sia, aurreko astean bezala, laugarren postuan daude ''Titanium'' abestiarekin, eta ondoren, Gym Class Heroes eta Adam Levine ditugu ''Stereo hearts''-ekin. Jessie J-k gorakada nabarmena izan zuen aurreko astean ''Domino''-rekin, baina oraingoan, postu bat galdu du eta seigarrenean kokatu da.

Berri Txarrak zazpigarrenean dago aste honetan ''Iraila'' kantuarekin, eta Aviciik gora egin du nabarmen ''Levels''-ekin, 16.-etik 8. postura igo da eta. Ze Esatek! Taldeak postu bat atzera egin du ''Urriak 11'' abestiarekin. Eta LMFAO eta ''Sexy and I know it'', hamargarrenean daude oraingoan.

Hauek dira ondorengo postuetan dauden kantu eta artistak:

11. La Oreja de Van Gogh: ''Cometas por el cielo''
12. Rihanna: ''We found love''
13. Taio Cruz + Flo Rida: ''Hangover''
14. Ken Zazpi: ''Giltzak''
15. Gotye: ''Somebody that I use to know''
16. David Guetta + Usher: ''Without you''
17. Lana Del Rey: ''Born to die''
18. Rizzle Kicks: ''Mama do the humb''
19. Lady Gaga: ''Marry the night''
20. Nickelback: ''When we stand together''

Zerrendagaiak, berriz, hauexek dira: Flo Rida eta Sia, eta Sean Paul. Lehenengoak, ''Wild ones''-ekin, eta bigarrena ''She doesn’t mind'' kantuarekin.

Gogoratu, zuen kantu gustukoenaren aldeko botua eman dezakezuela Gaztearen webgunean.

54. Grammy sarien banaketa ekitaldia bihar, otsailaren 12an, izango da Los Angeleseko Staples Center pabilioian, eta sari-banaketan Kanye West, Adele, Bruno Mars eta Foo Fighters taldea dira nagusi, izan ere, lehenengoak zazpi izendapen ditu, eta beste hirurek seina.

Izendapen hauetan, Kanye West da faborito rap kategorian, eta Urteko Hitz Onenen atalean izendatu dute. Bestalde, Urteko Disko Onenaren eta Urteko Kantu Onenaren kategorian sartu dira Bruno Mars eta Adele.

Bestalde, Rihannak eta Radioheadek lau izendapen dituzte, eta Coldplayk, Taylor Swiftek eta Eminemek hiru. Lady Gagak ere hiru izendapen ditu, eta Kantu Onenaren saritik kanpo geratu den arren, Disko Onenaren saria lor dezake Born this way lanari esker. Beyoncek eta Foster the people taldeak, berriz, bi izendapen ditu.

Musika latinoari dagokionez, Pop, Rock eta Urban Diskorik Onenaren kategorian daude izendatuta Calle 13, Maná eta Gustavo Galindo.

Sariak banatzeaz gain, hainbat artistek zuzeneko emanaldiak eskainiko dituzte: Adele, Maroon 5, Chris Brown, Foo Fighters, David Guetta, Coldplay, Rihanna, Alicia Keys, Bruno Mars, Nicki Minaj, Katy Perry eta Taylor Swift, besteak beste.