Whitney Houston abeslaria sendagaiak eta alkohola nahasteagatik hil zen, eta ez itota, prentsa arrosa jorratzen duen TMZ AEBetako webguneak kaleratu duenez. Depresioaren aurkako Xanax sendagaiaren hainbat pastilla hartu omen zituen Houstonek.

Iturri horrek berak jakitera eman duenez, Los Angeles hiriko Beverly Hilton hoteleko gela batean aurkitu zuten Whitney Houstonen hilotza, bainugelako bainuontzian. Mary Jones abeslariaren izebak aurkitu zuen.

Bart egin duten Grammy sarien banaketa ekitaldia dela-eta antolatutako festa batera joateko asmoa omen zuen Whitney Houstonek.

Dena den, hilabete eta erdi edo bi hilabete barru jakingo da ofizialki heriotzaren arrazoia.

Mendekotasunei aurre egiteko, joan den urtean abeslariak laguntza jaso zuela baieztatu du familiak.

Adele izan da erregina Grammyak banatzeko 54. ekitaldian. Ezustekorik gabe nagusitu da 23 urteko artista britainiarra, sei garaikur eskuratuta. Los Angelesen egindako sari-banaketa hunkigarria izan zen, larunbatean zendutako Whitney Houston kantaria gogoan izan eta goraipatu baitzuten.

Adelek aurreikuspen guztiak bete ditu eta izendatuta zegoen maila guztietan lortu du saria. "Rolling in the deep" 2011ko Kantu Onena izendatu dute eta haren hitzei dagokien saria, Hitz Onenari ematen zaiona, ere harentzat izan da. Kantari ingelesaren bigarren diskoa, '21' izenekoa, gainera, Diskorik Onena izan da.

Gainera, urrezko mikrofono gehiago ere jaso zituen Adelek: Pop mailako Bakarkako Emanaldi Onena, Pop mailako Disko Bokal Onena eta Musika Bideo Labur Onena. Taula gainera igo zen sei aldietan hitz gutxi egin zuen Adelek, baina, erdi-malkotan, ama, lagunak eta duela bost hilabete ahots-kordatako ebakuntza egin zioten medikuak izan zituen gogoan.

"Disko honen funtsean harreman dohakabe bat dago eta, aurten, bizitza aldatu zait", adierazi du Adelek. Ahotsarekin izandako arazoek zaildu egin dute azken aldian kantariaren ibilbidea eta atzokoa gau berezia izan zen harentzat, ebakuntzaren osteko lehen emanaldia eskaini zuen Grammyak banatzeko ekitaldian. Staples Center ezagunean bildutakoak zutik jarri zituen "Rolling in the deep" abestuta.

Grammyek berretsi egin zuten Adelen pisua musikaren munduan eta, neurri berean, 80ko eta 90eko hamarkadetako emakume ahots indartsu bat agurtzeko ere baliatu zuten ekitaldia. Larunbatean hilik aurkitu zuten 48 urteko Whitney Houston gogoan izan zuten etengabe. Aurkezle lanak egin zituen LL Cool J raperoak otoitz bat eskatu zuen lehenik eta, ondoren, Houston "I will alway love you" kantu arrakastatsua abesten erakusten zuen bideo bati paso eman zion gero. Ondoren, kantu bera moldatu zuen zuzenean Jennifer Hudson kantariak eta hori izan zen unerik hunkigarriena.

Gainontzeko irabazleei dagokienez, Foo Fighters talde estatubatuarra nagusitu zen Rock kategorian (bost sari irabazi zituen), Kanye West Rapean (lau garaikur eskuratu bazituen ere, ez zen sari-banaketa ekitaldian izan) eta DJ Skrillex, berriz, Dance musikaren mailan.

Bi sari irabazi zituzten Taylor Swift, Bon Iver, Cee Lo Green, The Civil Wars, Tony Bennet eta Chick Corea kantariek. Bestalde, Mana nagusitu da Pop eta Rock Latinoaren mailan. Tonny Bennett beteranoak bere ibilbideko 17. Urrezko Mikrofonoa irabazi zuen iaz hildako Amy Winehousekin batera grabatutako kantari esker.

Zuzeneko emanaldietan Nicki Minaj kantariak izan zuen unerik nabarmenena, exorzismo baten plantak egin baitzituen bere saioan. Bestalde, The Beach Boys talde estatubatuar mitikoaren itzulera nabarmentzekoa izan zen, baita Paul McCartneyk, Bruce Springsteenek eta Foo Fighters taldeko lider Dave Ghrolek sari-banaketa amaitzeko egindako gitarra-inprobisazioa ere.

Whitney Elizabeth Houston 1963ko abuztuaren 9an jaio zen.

Txikitatik musikarekiko interesa izan zuen eta bere familiako hainbat abeslariren eragina izan zuen, besteak beste, Cissy Houston bere amarena, Dionne eta Dee Dee Warwick lehengusinena eta bere amabitxiarena, Aretha Franklinena, hain zuzen ere.

11 urterekin New Jerseyko eliza bateko abesbatza batean hasi zen, New Yorkeko tabernetan bere amarekin abesten hasi zen arte. Bertan, Clive Davis Arista Records diskografiako zuzendariak ezagutu zuen.

"The voice" (Ahotsa) bezala ezagutua izan da bere ahotsaren kalitatea dela eta. 1985an, "Whitney Houston" albumarekin ospea lortu zuen eta 30 milioi kopia saldu zituen. Emakume batek lehenengoz argitaratzen zuen diskorik salduena bilakatu zen.

1980 eta 1990 hamarkada bitartean hainbat disko grabatu zituen eta 1992an "The Bodyguard" (Bizkartzaina) filmarekin zinemara salto egin zuen. Kevin Costner aktorearekin batera protagonista izan zen eta mundu osoa zehar arrakasta lortu zuen.

Nazioarteko izar gisa ospetsu bilakatu zen "I will always love you" kantarekin.

Historian zehar sari gehien jaso dituen emakumea izan da Guinness errekorren liburuaren arabera. Jasotako sarien artean, bi Emmy, sei Grammy, 30 Billboard Music eta 22 American Music eskuratu zituen.

Zazpi urtez diskorik argitaratu gabe egon ostean, 2009an bere azken lana atera zuen eta berriro gorenera iritsi zen "I look to you" diskoarekin. AEBetako zerrendetan lehenengo postura iritsi zen eta mundu osoan zehar kritika onak jaso zituen.

2010erako 415 sari eskuratu zituen, eta historian disko gehien saldu dituen artistetako bat izan da; 170 milioi baino gehiago.

Baina azken urteetan, bere ibilbidea zapuztu egin zen drogen eta Bobby Brown bere senarrarekin zituen arazo sentimentalen eraginez.

Whitney Houston abeslaria larunbat honetan hil da, 48 urte zituela, CNN AEBetako telebista kateak zabaldu duenez. Informazioa artistaren managerrak baieztatu du, heriotzaren nondik norakoak argitu ez baditu ere.

80 eta 90ko hamarkadetako poparen erregina Beverly Hilton hotelean zegoen Grammy sari banaketan parte hartzeko asmoa baitzuen. Beverly Hillseko Poliziak baieztatu zuenez, Larrialdi Zerbitzuek hotelaren abisua jaso zuten eta bertara hurbildu ziren.

Hoteleko laugarren solairuko logela batean, 15:30ean (00:30ean hemengo orduan) Houstonen hilotza aurkitu zuten. Hogei minutu eman zituzten hura indarberritu nahian baina ez zuten lortu. Dirudienez, gorpuak ez zituen indarkeria zantzuak baina heriotzaren nondik norakoak oraindik argitzeke daude.

"Harekin zeuden lagunek eta senitartekoek abeslaria bera zela egiaztatu dute eta familia jakinaren gainean daude dagoeneko", azaldu die kazetariei Mark Rosen tenienteak.

Auzitegiko medikuek autopsia egin ostean, handik egun bat ala bi egunetara zabalduko dituzte ondorioak baina Houstonen odolean drogaren edo alkoholaren arrastoak aurkitzen baldin badituzte, litekeena da emaitzak ezagutzeko 6-8 aste itxaron behar izatea.

Doluminak musika munduan

Abeslariari omenaldiak nonahi zabaldu dira. Interneteko sare sozialetan eta baita eszenatokietan ere tristura da nagusi. Mississippin abesten zegoela, heriotzaren berri izan du Bobby Brown Houstonen senar ohiak. Brown negar egiten hasi da, 'Whitney, I love you!" oihukatu du eta zerura musuak bota ditu.

Arrakastaz beteriko abeslaria

Houstonek 170 milioi disko baino gehiago saldu zituen eta azken abestia aurten kaleratzea aurreikusita zegoen. 'Sparkle' izenburua zuen eta 1976. urtean ateratako abestiaren bertsio berri bat izateko asmoa zuten. Houstonek drogarekiko eta alkoholarekiko urte askotako menpekotasuna zuen eta 2011an zaletasun horiek gainditzeko laguntza eskatu zuen.

Houstonek gospel, pop, R&B musika estiloak abestu zituen eta beste alor ere jorratu zituen tartean, aktore, musikagile, ekoizle, enpresari eta modeloa.

Houston 'The Voice' izengoitiarekin zen ezaguna eta ospe handia lortu zuen, 1985ean bereziki, izen berdina zuen diskoaren 30 milioi kopia saldu zituenean. Historian inoiz emakumezko batek lortutako arrakasta handiena suposatu zuen.

Hortik bi urteetara bigarren disko bat atera eta beste marka bat hautsi zuen: disko horrek Bilboard 200 zerrendako lehen postua eskuratu zuen eta horren ondorioz, hura lortzen duen lehen emakume bihurtu zen. Halaber, salduenen artean lehen postuan aste gehiago eman dituen diskoak Houstonenak izan dira, 'Whitney', 'Waiting to Exhale' eta 'The Bodyguard', hain zuzen ere.

Guztira, abeslari estatubatuarrak zazpi disko, filme hiru soinu-banda eta 53 single kaleratu zituen. 'I always love you' emakume baten singlerik salduena izan zen. Sei Grammy sariak, bi Emmy, 30 Bilboard Music Awards eta 22 American Music Awards golardo irabazi zituen.

Zinema munduan ere aritu zen eta bi filmeetan parte hartu zuen: 'The Bodyguard' 1992ean eta 'The Preacher´s Wife' 1995ean.

Bilbao BBK Live 2012ko hiru eguneko bono berezien eskaintza bukatu ostean, uztailaren 12tik 14ra bitartean Bilbon egingo den musika jaialdi honetarako eguneko sarreren salmenta hasi da. Hain zuzen ere, osteguneko eta ostiraleko sarrerak jarri dituzte gaur salgai, 55 euroren truke (+6 euro, banaketa gastuengatik).

Larunbateko kontzertuetarako sarrerak aurrerago egongo dira eskuragarri.

Aurreko asteetan iragarri genizuen bezala, besteak beste, The Cure eta Show Patrol arituko dira uztailaren 12an (osteguna), Kobetamendin, eta Radiohead eta The Kooks, ostiral gauean.

Salmenta tokiak

Sarrerak BBK-ko kutxazainetan, BBK-ren webgunean eta 944 310 310 telefonoan eskuratu daitezke.

Euskal kantarik zaharrenetako baten melodia izan daitekeena aurkitu dute Khantoria taldekoek. IX. mendean hasi eta XV. mendera arteko herri-musikan eta eleiz kantuetan ageri da. Soinu hauxe du hamaika mendez entzun zen melodiak.

XV. mendetik ezagutzen dugu Bereterretxen kantua. Melodia bera IV. mendean ere kantatzen zutela dakigu orain. Mendekoste eguneko himnoaren doinu berbera da eta elizan abesten zen himno hori IV. mendean datatuta dago.

Melodia horrek izan duen bilakaera ikertu eta diskoa kaleratu dute Khantoria taldekoek. Durangon, Kurutziagako gurutzearen alboan egingo dute estreineko kontzertua.

Gurutzearen goi partean hari instrumentuekin agertzen diren aingeruak bezala, bibolinaz eta biolaz arituko dira Kanthoriakoak aintzinako doinuei moldaketa berriak eginez.

The Beach Boys 60ko hamarkadako talde mitikoa agertokietara itzuliko da, bi hamarkada isilean eman ostean. Grammy sarien galan itzuliko da, datorren igandean, Los Angelesen, antolatzaileek jakinarazi dutenez.

"Surfin' Safari", "Surfin' USA" eta "Good Vibrations" abestien egileak Foster the People eta Maroon 5 hautagaien agertoki berean arituko dira sari horiek emateko ekitaldian.

Brian Wilson, Mike Love, Al Jardine, Bruce Johnston eta David Marks dira The Beach Boys, eta 2012an, taldearen 50. urteurrena betetzearekin batera, agertokietara itzultzea erabaki zuten.

Urte amaieran disko berri bat kaleratzeko asmoa dute, eta bira egingo dute gero. Grammy sariak emateko ekitaldian Adele abeslaria ere berragertuko da: abesti onenaren ("Rolling in the Deep") eta disko onenaren ("21") sariak eskuratzeko faboritoa da. 2011n ahots-kordak sendatzeko ebakuntza bat egin ostean itzuliko da agertokietara.

Beste hauek ere arituko dira ekitaldi horretan: Chris Brown, Coldplay, Rihanna, Foo Fighters, Alicia Keys, Lil Wayne, Bruno Mars, Paul McCartney, Katy Perry, Bruce Springsteen eta Taylor Swift. Grammy sarien 54. edizioa LL Cool J rap-kantariak gidatuko du, eta Los Angeleseko Staples Center pabiloian egingo dute.

Bartzelonako Sónar jaialdia ekainaren 14tik 16ra ospatuko dute aurten, eta hainbat talde konfirmatu dituzte jada antolatzaileek: Hot Chip, Azari & III, Metronomy, The Roots edo James Blake DJ, Fatboy Slim, Ritchie Hawtin eta Amon Tobin.

Sónar 2011 jaialdiak arrakasta handia lortu zuen. Musika, instalazio artistikoak eta sektoreko profesionalak biltzeko espazioak jasotzen ditu, baina kontzertuak dira horren ardatz nagusia: aurten, Modeselektor, Squarepusher, Deadmau5, Nicolas Jaar, Luciano, Jacques Lu Cont, Friendly Fires, John Talabot eta Mouse on Mars izango dira bertan, gaur jakinarazi dutenez.

Beste hainbat talde konfirmatu dituzte 2012ko ediziorako (aurten ez dute Coruñan egingo), tartean, Alva Notoren proiektu berria eta Byetone, LSB (Laurent Garnier). The Roots, gaur egungo hip hop talde garrantzitsuenetariko bat, ere Bartzelonan izango da.

Pop dantzagarri eta freskoa egiten duen Hot Chip (disko berria besapean duela), Metronomy eta Austra ere bertan arituko dira. Heldu berriei tokia egingo diete, baina baita beteranoei ere: James Blake (DJ lanetan), Nicolas Jar (iaz sekulako arrakasta lortu ondoren, aurten berriro izango da bertan), Maya Jane Coles, Jacques Green, Julio Bashmore, Thundercat, Cooly G, The suicide of Western Culture, Uner eta Blawan.

Donostiako Heineken Jazzaldiaren 47. edizioa uztailaren 19tik 23ra bitartean ospatuko dute eta, antolatzaileek jakinarazi dutenez, hauek izango dira: Antony, Bobby McFerrin, Jamaican Legends (Sly & Robbie, Monty Alexander eta Ernest Ranglin), Yellowjackets, Ray Gelato, Marc Ribot, Ninety Miles (Stefon Harris, David Sánchez eta Nicholas Payton) eta Peter Evans.

Gainera, uztailaren 20an Victoria Eugeniaren mendeurrena ospatuko dute eta doako kontzertuak izango dira antzokiaren txoko askotan.

40 instrumentuz osatutako orkestra batekin izango da Antony. Et Incarnatus euskal orkestra izango du lagun eta bere azken lau diskoetako abestiak konponketa sinfonikoekin eskainiko ditu. Bakarka edo The Johnsonsekin batera, Antonyk arte garaikidearen muga gainditzen jarraitzen du.

Bobby McFerrin mundu mailako abeslari garrantzitsuenetarikoa da. Don't Worry, Be Happy abestia baikortasunari egindako kantua da eta ikono unibertsala da. Kasu honetan, Yellowjackets taldearekin izango da, jazz modernoaren eragin handiko taldea, hain zuzen ere. 13 Grammy sari eskuratu dituzte.

Berri Txarrak taldeak larunbatean ekin zion 'Haria' diskoa zuzenean aurkezteko birari eta, lehen iragarpenetan Gipuzkoarako hitzordurik ez bazegoen ere, azkenean bi hitzorduren berri eman dute: otsailaren 17an Tolosan, Bonberenean arituko dira Gorka Urbizu eta konpainia eta apirilaren 13an, berriz, Donostiara helduko dira, Gazteszena aretora, alegia.

Inauterietako ostiralean, Ostiral Mehe egunean, daukate lehen hitzordua Gipuzkoan, Tolosako Bonberenean. Baina, hori bai, kontzertu horretara joateko asmorik bazenuen eta sarrerarik hartzeko aukerarik izan ez baduzu, jai daukazu, atzo salgai jarritako 400 sarrerak agortu egin baitira. 

Donostiako kontzerturako sarrerak eskuragarri daude jada Kutxa sarean 14 euroren truke (txarteldegian 17 euroko salneurria izango dute). 21:00etan hasiko da kontzertua Erizo taldeak egingo ditu Berri Txarraken atarikoak.