Zuen botoak zenbatu eta gero gure zerrenda osatu dugu Gaztean eta hauxe izan da aste honetako emaitza:

Carly Rae Jepsenen “Call me maybe” kanta izan da garaile aste honetan. Bigarren postutik lehenengora pasatu da kanadarraren abestia, eta bigarrenera pasatu da, aldiz, joan den asteko irabazlea, Enkore talde euskaldunaren “Dantzan, dantzan”.

Hirugarren postuan Nicki Minajen "Starship" daukagu eta laugarrenean Jennifer Lopez eta Pitbullen “Dance Again”. Bitartean, hamargarrenetik bosgarrenera salto egin du Rihannaren “Where Have You Been” abestiak.

Seigarrenean Fun eta Janelle Monaeren lankidetza daukagu: “We are young” eta zazpigarrenean, Pitbull eta Chris Brownen “International Love”.

Jarraian, zortzigarren eta bederatzigarren postuetan Gotye eta Katy Perry ditugu “Somebody that I used to know” eta “Part of me” abestiekin. Hurbiletik jarraitzen die Madonnaren “Girl gone wild” kantak, hamargarrenetik.

Horrela geratu dira zerrendaren hurrengo postuak:

11. Lauroba: “Zer egin eta zer izan”
12. Florida + SIA: “Wild ones”
13. Adele: “Someone like you”
14. Maroon 5 + Wiz Khalifa: "Payphone"
15. Jason Derulo: "Breathing"
16. LMFAO: “Sorry for party rocking”
17.The Uski’s: “Tximinotan”
18. Keane: “Silenced by the night”
19.Esne Beltza: “Nahi dut”
20. Jessie J: “Domino”

Azkenik, hauek dira aste honetan zerrendan sartzeko prest dauden hautagaiak:
- Tacabro: “Tacata”
- B.O.B: “So good”

Astero bezala, astelehenetik aurrera dendetan aurkitu ahal izango dituzuen disko berrien errepasoarekin gatoz Gaztean. Oraingoan Azelia Banks, Scissor Sisters eta Juanes ditugu nobedade horien artean.

Azealia Banks: 1991
Rap-musikari estatubatuarra bere lehenengo diskoaren aurrerapenarekin dator aste honetan. Lau abesti ditu asteartean kaleratuko den EP-ak: “1991”, “Van Vogue”, “212” eta “Liquorice”. Halaber, 1991 izena ipini dio lanari abeslari gazteak, hori baita bera jaio zen urtea.

Scissor Sisters: Magic hour
Maiatzaren 28an kaleratuko du talde estatubatuarrak Magic hour, estudioko laugarren lana. “Only the horses”, lanaren lehenengo singlea, Calvin Harrisen laguntzarekin ekoitzi du taldeak. Azealia Banksek, Stuart Pricek, Pharrel Williamsek eta Alex Rihdak ere, diskoan parte hartu dute. “Erritmo biziko pop nahasketa goxoa” da diskoa Jake Shears taldeko kidearen ustez.

Juanes: MTV Unplugged
Kolonbiarraren kontzertu akustikoarekin goxatzeko aukera izango dugu asteartetik aurrera. Otsailean, Miamiko New World Center eraikinean, grabatutako zuzenekoan 16 musikarien laguntza izan zuen abeslariak bere kanta berezienak interpretatzeko. Gainera, kontzertu horretarako bereziki idatzitako hiru kanta abestu zituen Juanesek, horietako bat Joaquin Sabinarekin.

Every mother counts bilduma
David Bowiek, Bonok, Patti Smithek, Stingek, Coldplayk eta beste hainbat artistek parte hartu dute helburu solidarioa daukan Every mother counts bilduman. Disko horren salmentekin lortutako dirua haurdunaldian hiltzen diren emakumeen kopurua murrizten saiatzeko erabiliko da. Orotara, 19 kanta esklusibo ditu diskoak.

Asteburu honetan inoiz baino kontzertu gutxiago egongo dira Euskal Herrian. Halere, badira aipatzeko moduko hainbat hitzordu eta Gazteak zuzeneko garrantzitsuenen errepasoa egin du:

LARUNBATA

Larunbateko hitzordu gehienak Gipuzkoan izango dira. The Sonic Beat Explosion eta Rafa Ruedak Andoainen joko dute, Laurobak eta Tristan Crowley & Mikel Uhartek, Donostian, eta Esne Beltza, Itziarren Semeak eta Leihotikan taldeek, Irunen. Bukatzeko, Zarautzen Udaberrifest jaialdia ospatuko da, Rosario Floresen musikarekin.

Bestalde, Berri Txarrakek Haria diskoa aurkeztuko du Elizondoko Lur aretoan eta Hesianek Mungiako Olalde aretoa bisitatuko du. Gainera, Mugerren Unama, Anari eta Willis Drummonden doinuak entzungo dira.

IGANDEA

Musika Zuzenean webgunean antolatuko Jaialdi Akustikoa izango da igandeko protagonista nagusia. Honek, besteak beste, Gorka Urbizu eta Imanol Ubeda kantarien musika jasoko du.

Horrez gain, Bergarara hurbiltzen direnek Luhartz taldearen abestiekin dantzatzeko aukera izango dute.

Gaztearen Bideoklip Lehiaketa bozketa fasean sartu da bete-betean. Sailkapena puri-purian dago une honetan. Lehen tokian ''Txerritxuleta'' bideoklipa dago 511 boto lortu ostean. Oso hurbiletik jarraitzen dio ‘’Party Rock Anthem’’ bideoak, 507 botorekin.

Ondoren, ''We go together’’ (456), “Paradise” (430) eta “Mama Lumba” (386) bideoklipak dira erabiltzaileen gustukoenak.

Ekainaren 1ean amaitzen da bozkatzeko epea. Beraz, animatu eta hautatu gehien gustatzen zaizuen lana! Ekainaren 5ean "Dida" saioan iragarriko dugu irabazlearen izena. 3.000 euro daude jokoan!